२२ असार, एजेन्सी ।
बेलारुसमा शरण लिएका भनिएका वाग्नर समूहका नेता येभ्गेनी प्रिगोजिन हराएको आशंका गरिएको छ । गत महिना बेलारुसका राष्ट्रपति अलेक्जेन्डर लुकासेन्कोको मध्यस्ततामा वाग्नर समूहले कु का लागि मस्कोतर्फ बढाएको कदम फिर्ता लिएको थियो र प्रिगोजिनसहित यो समूह बेलारुस प्रस्थान गरेको स्वयं लुकासेन्कोले नै मिडियामा बताएका थिए ।
लुकासेन्कोले प्रिगोजिनलाई बेलारुसले शरण दिन सहमति जनाएका थिए । त्यसपछि नै प्रिगोजिनविरुद्धको देशद्रोहलगायत आपराधिक मुद्दा फिर्ता भएसँगै रुसमा गृहयुद्धको अवस्था टरेको थियो । तर, यतिबेला लुकासेन्कोले नै प्रिगोजिन बेलारुसमा नभएको बताएका छन् । लुकासेन्कोले पत्रकारहरूसँग कुराकानी गर्दै प्रिगोजिन रुसको दोस्रो ठूलो शहर सेन्ट पिटर्सबर्ग गएको हुन सक्ने अथवा मस्कोतिर भएको हुन सक्ने बताए ।
उनले प्रिगोजिन ठ्याक्कै कहाँछन् भनेर खुलाउन सकेनन् । लुकासेन्कोले प्रिगोजिन अहिले पनि रुसमै रहेको र बेलारुसमा कुनै पनि लडाकु समूहले आफ्नो विद्रोह अन्त्यका लागि सम्झौता नगरेको दाबीसमेत गरेका छन् । मिन्स्कको प्रेसिडेन्ट बिल्डिङ अफ इन्डिपेन्डेन्समा साढे तीन घण्टा लामो गोलमेच वार्तामा उनले एएफपीलगायत अन्तर्राष्ट्रिय र बेलारुसका पत्रकारसँग कुराकानी गरेका थिए ।
सो क्रममा उनले प्रिगोजिन स्वतन्त्र व्यक्ति भएको भन्ने कुरा आफूलाई ‘निश्चितरूपमा’ थाहा भएको बताउँदै भने, ‘मैले हिजो उनीसँग फोनमा कुरा गरेको थिएँ ।’ क्रेमलिनले असफल विद्रोहमा भाग लिएकाहरूलाई बेलारुस जान प्रस्ताव गरे पनि वाग्नरका सदस्यहरूले बेलारुसमा शिविर स्थापना नगरेको पनि उनले बताए ।
लुकाशेन्कोले भने, ‘अहिले उनीहरूको स्थानान्तरण र व्यवस्थापनको प्रक्रिया तय भएको छैन ।’ उनले थपे, ‘यो निर्णय उनको होइन, मस्कोको हो ।’ यता रुसी अधिकारीहरूले भने प्रिगोजिनको व्यवसाय बन्द गराउँदै हिडेका छन् । साथै उनी रहनसक्ने स्थानहरुमा छापा मारिरहेको कतिपय भिडियोहरु समेत मिडियाहरुमा आएका छन् ।
रुसी सञ्चारमाध्यमले बुधवार प्रसारण गरेको तस्बिरमा प्रहरी प्रिगोजिनको विशाल र विलासी भवनमा जुन २५ मा हेलिकप्टर पार्किङ गरी राखिएको अवस्थामा प्रवेश गरेको देखिएको छ । तस्बिरमा प्रहरीले रुबल र डलर, सुनका सिक्का, हतियार, विगले भरिएको कोठरी र प्रिगोजिनको नाममा थुप्रै राहदानी र विभिन्न व्यक्तिको फोटो फेला पारेको देखिएको छ ।
यसले सैन्य विद्रोहको असफल प्रयास गरेका वाग्नर प्रमुख येभेग्नी प्रिगोजिनको तेजोबध गर्न खोजेको जस्तो देखिने अभियान रुसी सरकारले सुरु गरेको संकेत दिएको छ । किनभने प्रिगोजिनको आपराधिक पृष्ठभूमि केलाउँदै रुसी सरकार नियन्त्रित च्यानलहरूले प्रिगोजिन लालचबाट निर्देशित भएको र उनको सम्बन्ध विदेशी गुप्तचरसँग रहेको दाबी गरेका छन् ।
रुसको सरकारी संयन्त्रबाट प्रिगोजिनको व्यक्तिगत जीवन र उनको पृष्ठभूमिबारे यति धेरै नकारात्मक तथा हानिकारक विवरण प्रसारित भएको यो पहिलो पटक हो । केही समयअघिसम्म पनि रुसी टेलिभिजनहरूले भाडाका सैनिकहरूको समूह वाग्नरलाई सकारात्मक ढङ्गले प्रस्तुत गरिरहेका थिए ।
