२७ मंसिर , काठमाण्डौ ।
नेपाल प्रिमियर लिग एनपीएल २०२५ को निर्णायक मोडमा आज उपाधिका निम्ति सुदूरपश्चिम रोयल्स र लुम्बिनी लायन्स पहिलो पटक च्याम्पियन बन्ने लक्ष्यसहित प्रतिस्पर्धामा उत्रिँदैछन् । आजको विजेता जो बनेपनि एनपीएलमा इतिहास बन्नेछ ।
कीर्तिपुरस्थित त्रिवि क्रिकेट रंगशालामा ‘हाउसफूल’ दर्शकमाझ सुदूरपश्चिम आफ्नो वर्चस्व कायम राख्दै पहिलो पटक च्याम्पियन बन्न चाहन्छ । यता, लुम्बिनी गत सिजनको चोटलाई उपाधिले निको पार्ने लक्ष्यमा छ ।
खेल दिउँसो ३ः३० बजेदेखि सुरु हुने तालिका छ । “प्रतियोगिता दौरान कुनै समय हामीलाई प्लेअफसम्म आइपुग्न पनि सबै खेल जित्नु पर्ने दबाब थियो । अब अन्तिम एक खेलमा पनि यस्तै लय रहनेछ भन्ने आशा लिएको छुँ,” दोस्रो क्वालिफायरमा विराटनगर किंग्सविरुद्ध ४० रनको जितपछि फाइनलबारे लुम्बिनी लायन्सका ब्याटर डार्सी शर्टले भने ।
गत सिजन सबैभन्दा खराव प्रदर्शनसहित तालिकाको पुछारमा रहँदै प्रतियोगिता टुंग्याएको टिम हो, लुम्बिनी लायन्स । यो सिजन पनि १४० रनको औसत ब्याटिङ भए पनि लिग चरणको आफ्नो चौथो खेलदेखि पछिल्ला पाँच खेलमा लगातार जितसहित लुम्बिनीले फाइनल यात्रा तय गरेको छ ।
लिग चरणका सात खेलमध्ये चारमा जित र तीनमा हारको नतिजासँगै आठ अंक जोड्दै चौथो स्थानसहित लुम्बिनी प्लेअफमा आएको थियो । जहाँबाट लुम्बिनीले इलिमिनेटरमा काठमाण्डू गोर्खाजविरुद्ध चार विकेटको जितसहित दोस्रो क्वालिफायर यात्रा तय ग¥यो ।
दोस्रो क्वालिफायरमा विराटनगर किंग्सविरुद्ध ४० रनको सहज जित निकालेसँगै लुम्बिनी गत सिजनको पिडा भुलाउँदै फाइनल प्रवेश गरेको हो । लुुम्बिनीले लिग चरणको पहिलो खेलमा चितवन राइनोजविरुद्ध ६ विकेटको जित निकालेको थियो ।
तर, यसपछिका लगातार तीन खेलमा हार बेहोरेपछि लुम्बिनीले प्लेअफ पुग्न लिगका बाँकी सबै खेल जित्नुपर्ने समीकरण बनेको थियो । लुम्बिनी दोस्रो खेलमा कर्णालीविरुद्ध नौ विकेटले, तेस्रो खेलमा काठमाण्डू गोर्खाजविरुद्ध २२ रनले र चौथो खेलमा सुदूरपश्चिम रोयल्ससँग नै १४३ रनले पराजित भएको थियो ।
तर, पाँचौँ खेलमा लुम्बिनीले पोखरा एभेन्जर्सविरुद्ध तीन विकेटको, छैटौँ खेलमा विराटनगर किंग्सविरुद्ध पाँच विकेटको र सातौँ खेलमा साविक विजेता जनकपुर बोल्ट्सविरुद्ध चार विकेटको जित निकालेको थियो ।
“फाइनल पक्कै पनि फरक हुनेछ । हामी साँच्चै यो उपाधि जित्न चाहन्छौँ । दोस्रो स्थान खासै राम्रो हुँदैन । हामी त्यहाँबाट उठ्न आवश्यक छ,” फाइनलअघि सुदूरपश्चिमका बलर स्कट कुग्गेलिनले गत वर्षको निराशा र यो वर्षको आत्मविश्वास एकैपटक सुनाए ।
गत सिजन पनि यस्तै लयसहित सुदूरले फाइनल यात्रा तय गरेको थियो । तर, उपाधि भिड्न्तमा जनकपुरसँग निराश हुँदा एनपीएल च्याम्पियन बन्ने सपना सुदूरले पूरा गर्न पाएन । यस सिजन लिग चरणका सातमध्ये ६ जितसहित सुदूरले १२ अंकसहित शीर्ष स्थानमा रहँदै प्लेअफ यात्रा तय गरेको थियो ।
प्लेअफको पहिलो क्वालिफायरमा विराटनगर किंग्सविरुद्ध ७७ रनको कीर्तिमानी ९रनका आधारमा यो सिजनकै फराकिलो० जितसहित सुदूरले लगातार दोस्रो पटक फाइनलमा स्थान सुनिश्चित ग¥यो । ‘फ्यान फेबरेट’ सुदूरपश्चिम नै क्रिकेट विश्लेषकको नजरमा पनि उपाधिको मुख्य दाबेदार हो ।
सुदूरपश्चिमले लिग चरणका पहिलोदेखि ६ खेलसम्म लगातार जित निकालेको थियो । दीपेन्द्रसिंह ऐरीको कप्तानीमा रहेको सुदूरले दोस्रो संस्करणको पहिलो खेलमा काठमाण्डू गोर्खाजविरुद्ध २९ रनको जित निकालेको थियो ।
दोस्रो खेलमा पोखरा एभेन्जर्सलाई १८ रनले, तेस्रो खेलमा कर्णाली याक्सलाई ४५ रनले, चौथो खेलमा लुम्बिनीलाई नै सात विकेटले, पाँचौँ खेलमा जनकपुर बोल्ट्सलाई ६ विकेटले र छैटौँ खेलमा चितवनलाई ४९ रनले निराश बनाएको थियो ।
लिग चरणको सातौँ खेलमा भने सुदूरपश्चिमले विराटनगर किंग्सविरुद्ध ६ विकेटको हार बेहोरेको थियो । लिग चरणको अन्तिम खेलमा विराटनगरसँग हार बेहोरे पनि पहिलो क्वालिफायरमा भने सुदूरपश्चिमले सन्दीप लामिछानेको कप्तानीमा रहेको टिमलाई नै निराश बनाएको थियो ।
यही सानदार लयसहित लगातार फाइनल आएको सुदूरपश्चिमले आफ्नो प्रभुत्व प्रमाणित गर्दै उपाधिमा बदल्नेछ वा पुछारबाट उठेको लुम्बिनीले सिजनकै सबैभन्दा ठूलो चमत्कार पूरा गर्दै च्याम्पियन बन्नेछ ?
यसको जवाफ कीर्तिपुरले आज साँझ ७ बजेसम्ममा सुनाउनेछ । कीर्तिपुरले जुन नतिजा दिनेछ त्यो एनपीएलका लागि नयाँ च्याम्पियनका रुपमा नयाँ इतिहास बन्नेछ ।
