२४ असार,एजेन्सी ।
स्पेनलाई हराउँदै यु–२१ युरोकपको उपाधि इंग्ल्याण्डले जितेको छ। चार पटकको यु–२१ युरोकप विजेता टोली स्पेनविरुद्ध १–० कठिन जित निकाल्दै इंग्ल्याण्डले ३९ वर्षपछि उपाधिको खडेरी तोड्यो। इंग्ल्याण्डले यसअघि यु–२१ युरोकपको उपाधि सन् १९८४ मा जितेको थियो।
अन्तिम मिनेटमा स्पेनले पाएको पेनाल्टीलाई इंग्ल्याण्डको गोलरक्षक जेम्स ट्राफोर्डले रोकेपछि इंग्ल्याण्ड विजयी भयो। पहिलो हाफको अतिरिक्त समयमा पाएको फ्रि–किकमार्फत पामरले गोल गर्दै इंग्ल्याण्डलाई अग्रता दिलाएका थिए। सुरुवाती चरणदेखि नै इंग्ल्याण्डमाथि दबाब राख्दै आएको स्पेन दोस्रो हाफमा थप आक्रामक बन्यो।
६५ प्रतिशत बल पोसेसन बनाउँदै स्पेनले इंग्ल्याण्डको पोस्टमा २१ पटक आक्रमण गरेको थियो। तर गोल गर्न भने चुक्यो। दोस्रो हाफको अतिरिक्त समयमा स्पेनले पेनाल्टी पाएको थियो। कप्तान एबल रुइजले गरेको पेनाल्टी प्रहारलाई गोलरक्षक ट्राफोर्डले उत्कृष्ट बचाउ गरेका थिए। ट्राफोर्डको पन्चबाट बाउन्स भएको बललाई पुनः स्पेनिस खेलाडीले प्रहार गरे पनि पुनः ट्राफोर्डले बचाउ गरेपछि इंग्ल्याण्ड विजयी भयो।
सर्वाधिक ४ पटकको यु–२१ युरोकप विजेता स्पेन उपविजेतामै सीमित भयो। जारी युरोकपमा इंग्ल्याण्ड १ गोल पनि नखाइ विजेता बन्ने टोलीले बन्यो। उसले जारी प्रतियोगिताभर ११ गोल गर्दा १ गोल पनि खाएन। गोलरक्षक ट्राफोर्डले १ गोल पनि नखाइ विजेता बनेर इतिहास रचेका छन् ।
