१७ भदौ, एजेन्सी ।
अर्काे महिना हुन लागेको प्रधानमन्त्री पुष्पकमल दाहालको चीन भ्रमणमा बीआरआईसहित आफ्ना सुरक्षा र विकाससम्बन्धी अवधारणाहरूमा चीनले नेपालको समर्थन खोज्न सक्ने ठानिएको छ । किनभने चिनियाँ पक्षले हालैका वर्षहरूमा उसको महत्त्वाकाङ्क्षी बेल्ट एन्ड रोड परियोजनाको कार्यान्वयन सहितका विषयमा चासो व्यक्त गर्दै आएको छ ।
नेपालले भने बीआरआई अन्तर्गत ऋण लिएरभन्दा पनि अनुदानमा आधारित परियोजना अघि बढाउन इच्छुक रहेको जाहेर गर्दै आएको छ । पछिल्लो समय चीन भ्रमणमा गएक विभिन्न दलका नेताहरुसमग पनि चीनले बीआरआई कार्यान्जयनमा चासो देखाउँदै आएकाले अब प्रधानमन्त्रीको भ्रमणका क्रममा यसलाई मुख्य एजेण्डा बनाउने देखिन्छ ।
तर अब प्रधानमन्त्रीले बेइजिंगमा यो कुरामा आफ्नो अडान कसरी राख्छन्, सबैको चासो त्यसमा छ । यसैबीच इटालीका विदेश मन्त्री एन्टोनियो तजिनीले भने चीनसँगको सिल्क रोड परियोजनाले अपेक्षा अनुसार परिणाम दिन नसकेको बताएका छन् । इटालीले चार वर्ष अघि बेल्ट एन्ड रोड इनिसिएटिभ (बीआरआई) सम्झौता गरेको थियो ।
अमेरिकाको विरोधबीच इटालीको तत्कालीन सरकारले चीनसँग बीआरआई सम्झौता गरेको थियो । अहिले जियोर्जिया मेलोनी नेतृत्वको सरकारले भने चीनसँगको सो सम्झौताले अपेक्षा अनुसार व्यापार लक्ष्य पूरा गर्न नसकेको जनाएको हो ।
बन्दरगाह, रेलमार्ग र विमानस्थलजस्ता पूर्वाधारमा ठूलो लगानी गर्ने चिनियाँ राष्ट्रपति सी चिनफिङको महत्वाकांक्षी कार्यक्रमले एसिया, अफ्रिका र युरोपबीचको व्यापारिक सम्बन्ध सुधार गर्ने लक्ष्य राखेको छ । इटालीले यस वर्ष सो सम्झौता फिर्ता नलिएमा मार्च २०२४ मा स्वतः नवीकरण हुने जनाइएको छ ।
चीनसँगको सम्झौता कायम राख्ने कि नराख्ने भन्ने विषयको निर्णय भने इटालियन संसदले गर्ने तजिनीले बताए । चीन प्रस्थान गर्नुअघि तजिनीले भने, ‘सिल्क रोडले हामीले आशा गरेको परिणाम दिन सकेको छैन ।’ ताजिनीले आज चीन पुग्दैछन् ।
मंगलबारसम्म हुने उनको चीन भ्रमणका क्रममा उनले चिनियाँ अधिकारीहरूसँग भेटघाट गर्नेछन् । इटालीकी प्रधानमन्त्री जियोर्जिया मेलोनीले चीन भ्रमणको लागि इच्छा व्यक्त गरेकी छिन् । तजिनीको यो भ्रमण मेलोनीको भ्रमणबारे तयारी गर्न समेत रहेको बताइएको छ ।
