२४ साउन,एजेन्सी ।
पाकिस्तानका पूर्वप्रधानमन्त्री इमरान खानलाई पाँच वर्षका लागि राजनीतिमा प्रतिबन्ध लगाइएको छ । पाकिस्तानको निर्वाचन आयोगको आदेश अनुसार खान आउँदो पाँच वर्षसम्म चुनाव लड्न नपाउने भएका छन् । आयोगले खानलाई सम्पत्तिको गलत घोषणा गरेकोमा दोषी ठहर गर्दै अयोग्य ठहर गरेको अल जजिराले जनाएको छ । खानको निर्वाचन क्षेत्र अब खाली रहनेछ ।
पाकिस्तानी कानून अन्तर्गत दोषी व्यक्ति तोकिएको अवधिको लागि कुनै पनि सार्वजनिक पदमा उम्मेदवार हुन सक्दैन । खानमाथि प्रधानमन्त्री पदमा रहँदा प्राप्त महँगा उपहारहरु बेचेर सरकारी कोषमा जम्मा नगरेको आरोपमा अदालतले गएको शनिवार तीन वर्षको जेल सजाय तोकेको छ ।
खान अहिले जेलमा छन् । पाकिस्तान तहरीक ए इन्साफ (पीटीआई) पार्टीका नेता खान सन् २०१८ को मे मा प्रधानमन्त्री बनेका थिए । खान संसदले अविश्वास प्रस्ताव पारित गरेपछि सन् २०२२ अप्रिल १० मा पदमुक्त भएका थिए । खानले आफूमाथि लागेका आरोपको खण्डन गर्दै सबै आरोपहरु राजनीति प्रेरित भएको बताउँदै आएका छन् ।
अहिले पाकिस्तानको प्रधानमन्त्री शहबाज शरिफ छन् । पञ्जाब पुलिसका अनुसार खानको गिरफ्तारी पछि, प्रान्तका विभिन्न भागहरूमा २ सय भन्दा बढी पीटीआई पदाधिकारी र कार्यकर्ताहरूलाई पक्राउ गरिएको छ। यद्यपि, पीटीआईले आरोप लगाएको छ कि पुलिसले खानको गिरफ्तारीको बिरूद्ध प्रदर्शन गरिरहेका आफ्ना कार्यकर्ताहरूलाई मात्र पक्राउ गरेन उनीहरूलाई पक्राउ गर्न पार्टीका कार्यकर्ताहरूको घरमा छापा समेत मारेको छ।
खानका एक दर्जनभन्दा बढी समर्थकलाई आतंकवादको आरोपमा मुद्दा चलाइएको प्रहरीले जनाएको छ । एफआईआरका अनुसार, खानसँगै आएका व्यक्तिहरू, उनको मिडिया टोली सहित उनीहरूले शनिबार उनलाई पक्राउ गर्न गएको पुलिस टोलीलाई धम्की दिएका थिए।
एफआईआरमा भनिएको छ, “उनीहरूले प्रहरीहरूबाट सरकारी बन्दुक खोसेर आक्रमण गरे र उनीहरूलाई बन्दुक हानेर मार्ने धम्की दिए। पछि प्रहरीले उनलाई पक्राउ गरेको थियो । यसैबीच, पीटीआईको वकिलहरूको शाखा इन्साफ वकिल फोरमले सोमबार र मंगलबार लाहोर उच्च अदालत बाहिर विरोध प्रदर्शन गरेको थियो ।
पाकिस्तान मुस्लिम लीग–नवाज नेतृत्वको गठबन्धन सरकार र सेनाको विरुद्धमा नाराबाजी गर्दै उनीहरूको नेतालाई “नक्कली मुद्दा“ मा दोषी ठहराएकोमा आपत्ति जनाएका छन् । खानले मंगलबार तोशाखाना मुद्दामा आफ्नो सजायलाई चुनौती दिँदै “पक्षपाती“ न्यायाधीशको फैसला “उचित प्रक्रिया र निष्पक्ष सुनवाईको अनुहारमा थप्पड“ भएको भन्दै तीन वकिलहरू मार्फत अपील गरेका छन्।
