१९ मंसिर, काठमाण्डौ ।
त्रिवि अन्तर्राष्ट्रिय क्रिकेट रंगशालामा जारी दोस्रो संस्करणको नेपाल प्रिमियर लिग (एनपीएल)अन्तर्गत आज अपराह्न ४ बजे लुम्बिनी लायन्स र जनकपुर बोल्ट्स भिड्दै छन् । ६ खेलबाट ६ अंक जोडेको लुम्बिनीलाई प्लेअफ पुग्न जित अतिआवश्यक छ ।
आज लुम्बिनीले जितेमा पोखरा एभेन्जर्स, चितवन राइनोज र जनकपुर बाहिरनेछन् । गत संस्करणको विजेता जनकपुरले हालसम्म पाँच खेलबाट दुई अंक मात्र पाएको छ । उसले पनि जितलाई काम राखेमा प्लेअप समीकरण झन रोचक बन्नेछ ।
अहिलेसम्म तीन टोली प्लेअपमा पुगिसकेका छन्, जसमा अपराजित सुदूरपश्चिम रोयल्स क्वालिफायर पुग्दा काठमाडौं गोर्खाज् र विराटनगर किङ्ग्स प्लेअफमा रहेका छन् । सुदूरपश्चिम रोयल्सले हिजो चितवन राइनोजविरुद्ध ४९ रनको जित निकालेको छ ।
यो जितसँगै ६ खेलमा १२ अंक जोडेको सुदूरपश्चिमले शीर्ष स्थानमा रहँदै पहिलो क्वालिफायर खेल्ने पक्का भएको हो । यसैगरी सुदूरपश्चिमको जितसँगै विराटनगर किंग्सले पनि प्लेअफको यात्रा तय गरेको छ ।
हारसँगै ६ खेलमा चार अंक जोडेको चितवनको भने प्लेअफ सम्भावना कमजोर छ । त्रिवि क्रिकेट मैदानमा सुदूरपश्चिमले प्रस्तुत गरेको १ सय ७० रनको लक्ष्य पछ्याएको चितवन १७.१ ओभरमा १ सय २० रनमै समेटियो ।
चितवनका लागि रवि बोपाराले २९, देव खनालले २८, अर्जुन साउदले १६ र कप्तान कुशल मल्लले १५ रन बनाए । सुदूरपश्चिमका लागि पुनिल मेहराले तीन तथा अभिनाश बोहोरा, इशान पाण्डे, हिम्मत महरा र कप्तान दीपेन्द्रसिंह ऐरीले एक–एक विकेट लिए ।
त्यसअघि टस हारेर ब्याटिङको निम्तो पाएको सुदूरपश्चिमले निर्धारित २० ओभरमा चार विकेट गुमाउदै १ सय ६९ रनको योगफल तयार पारेको थियो । सुदूरपश्चिमका लागि क्रिस लिनले रिटायर्ड हर्ट हुनुअघि ५६ बलमा पाँच चौका र तीन छक्काको मद्दतले सर्वाधिक ७५ रनको योगदान गरे ।
यसैगरी आरिफ शेख र कप्तान दीपेन्द्रसिंह ऐरीले अविजित २४–२४, विनोद भण्डारीले २१ र पुनित मेहरले १३ रन बनाए । चितवनका लागि सैफ जेबले दुई तथा रञ्जित कुमार र जर्ज स्क्रिमशले एक–एक विकेट लिए ।
काठमान्डु गोर्खाज बिहीबार दिउँसो भएको खेलमा पोखरालाई पराजित गर्दै अन्तिम चारमा पुगेको हो। काठमान्डु लिग चरणका सातमध्ये पाँच खेलमा जित र दुई खेलमा हार ब्यहोर्दै १० अंकसहित दोस्रो स्थानमा छ।
विराटनगर लिग चरणका ६ मध्ये दुई खेलमा हार र चार खेलमा जितसहित आठ अंक बटुेर तेस्रो स्थानमा छ। आजको खेल जनकपुरले जितेमा भने ‘प्लेअफ’को प्रतिस्पर्धा रोचक बन्नेछ। समान ६ खेल खेलेको लुम्बिनीको ६ अंक छ भने पोखराको चार अंक छ।
त्यस्तै, पाँच खेल खेलेको जनकपुरको दुई अंक मात्रै छ। जनकपुरले लुम्बिनीपछि आइतबार कर्णाली याक्ससँग प्रतिस्पर्धा गर्नेछ। अहिलेसम्म कर्णालीमा प्लेअफको दौडबाट बाहिरिएको छ।
