१५ फागुन, एजेन्सी ।
टेस्ला, स्पेसएक्सका मालिक, विश्वकै धनाढ्य एलन मस्कले अब एक्समेल पनि ल्याउने घोषणा गरेका छन् । सामाजिक संजाल एक्स(पहिलाको ट्विटर) किनेका मस्कले यसका साथै अब ईमेल सेवा दिने गरि एक्समेल ल्याउने बताएका हुन् । मस्कले एक्समा सोधिएको प्रश्नमा एक्समेल आउने बताएका छन् । उनलाई सोधिएको प्रश्नको जवाफ दिँदै उनले आफूले एक्समेल इमेल सेवा प्रदायक ल्याउने जनाएका हुन् ।
गुगलको इमेल सेवा दिने जिमेललाई उनको इमेल सेवा प्रदायक एक्समेलले चुनौती दिने बताइएको छ । मस्कले एक्समेल ल्याउने पुष्टि गरेपनि त्यसको मिति भने घोषणा गरेका छैनन । सँगै यससँग जोडिएका अन्य विस्तृत विवरणहरु पनि उनले सार्वजनिक गरेका छैनन् । तर, गुगलको इमेल सेवा प्रदायक जिमेल बन्द हुने अफवाह चलिरहँदा मस्कले आफूहरुले ईमेल सेवा दिने एक्समेलमा काम गरिरहेको भने पुष्टि गरेका छन् ।
यता इन्टरनेट जगतको दिग्गज कम्पनी गुगलले भने जिमेल नै बन्द गर्न लागेको खबर तीव्र रुपमा फैलिएसँगै यस विषयमा सफाइ दिनुपरेको छ । गुगलले आफ्नो पेजमा यसबारेमा प्रष्टीकरण दिंदै जिमेल बन्द नहुने बताएको छ । जिमेल सेवा बन्द नहुने भएकाले प्रयोगकर्ताहरु चिन्तित हुनु नपर्ने गुगलले जनाएको छ ।
विश्वमा एक अर्ब ८० करोडभन्दा धेरै मानिसले जिमेल प्रयोग गर्दछन् । जिमेल सबैभन्दा लोकप्रिय इमेल सेवा हो । यद्यपि गुगलले जिमेलको आधारभूत एचटीएमएल भर्सन चाहिं बन्द गर्ने भएको छ । गुगलले कुनैबेला निकै चर्चित रहेका एप तथा सर्भिसहरु समेत एकपछि अर्को गरी बन्द गर्दै गएको बेला जिमेलसमेत बन्द गर्ने हल्ला धेरैले पत्याएका हुन् ।
हालसम्म गुगलले आफ्ना एप, सर्भिस तथा हार्डवेयर गरी २९३ वटा प्रडक्ट बन्द गरिसकेको छ । गुगलको इमेल सर्भिस जिमेल सन् २००४ को अप्रिल १ मा सुरु भएको थियो । गुगलले केहीअघि मात्रै अमेरिकामा आफ्नो अनलाइन भुक्तानी सेवा जी पे प्लाटर्फम बन्द गर्न लागेको समाचार सार्वजनिक भएको थियो ।
