१ असोज, एजेन्सी ।
एसिया कप क्रिकेट प्रतियोगिताको १६ औं संस्करण भारतलाई आठौं पटक च्याम्पियन बनाउँदै सकिएको छ । भारतले फाइनलमा घरेलु टोली श्रीलंकालाई १० विकेटको फराकिलो अन्तरले हराउँदै उपाधि चुमेको हो । प्रतियोगिताको मुख्य आयोजक राष्ट्र पाकिस्तान भए पनि अधिकांश खेल भने सह—आयोजक राष्ट्र श्रीलंकामा खेलाइएको थियो ।
भारतीय क्रिकेट कन्ट्रोल बोर्ड (बीसीसीआई) ले सुरक्षाको कारण देखाउँदै आफ्ना खेलाडीलाई पाकिस्तान नपठाउने अडान लिएपछि एसिया कपका अधिकांश खेल श्रीलंकामा सारिएको थियो । यो ऐतिहासिक जितपछि भारतीय टिममा पैसाको वर्षा भएको छ । श्रीलंकाको टोली पनि धनी बनेको छ ।
एसिया कप ट्रफी बाहेक एसिया कपमा च्याम्पियन बनेको टीम इन्डियालाई १ लाख ५० हजार अमेरिकी डलर अर्थात् करिब १ करोड ९८ लाख ९४ हजार भन्दा बढी रुपैयाँ दिइएको छ । उपविजेता बनेको श्रीलंकाली टोलीलाई ७५ हजार अमेरिकी डलर अर्थात् करिब ९९ लाख ४७ हजार रुपैयाँको चेक हस्तान्तरण गरिएको थियो ।
खेलको प्लेयर अफ दि म्याच मोहम्मद सिराजलाई ५ हजार डलर प्रदान गरिएको थियो । प्लेयर अफ द सिरिजका रुपमा कुलदीप यादवलाई १५ हजार डलरको चेक हस्तान्तरण गरिएको थियो । गत वर्ष श्रीलंकाले टी–२० ढाँचामा एसिया कप जितेको थियो । उसले ट्रफीसँगै २ करोड ५३ लाख रुपैयाँ पुरस्कार प्राप्त गरेको थियो । पाकिस्तानलाई उपविजेताको रुपमा १ करोड २५ लाख रुपैयाँ दिइएको थियो ।
उपाधि विजेता र उपविजेता टोलीका खेलाडीसँगै समापन समारोहमा आर प्रेमादासा रंगशालाका ‘ग्राउन्ड स्टाफ’ पनि पुरस्कृत भएका छन् । ‘ग्राउन्ड स्टाफहरु’ लाई ५० हजार अमेरिकी डलर (करिब ६६ लाख नेपाली रुपैयाँ) नगद पुरस्कार प्रदान गरियो । अप्ठ्यारो परिस्थितिमा पनि आफ्नो जिम्मेबारीलाई सफलतापूर्वक निर्वाह गरेकाले उनीहरुलाई पुरस्कृत गरिएको हो ।
भारतले आठौं पटक एसिया कप ट्रफी कब्जा गरेको हो । भारतले सन् १९८४, १९८८, १९९०–९१, १९९५, २०१०, २०१६, २०१८ र २०२३ मा यो उपाधि जितेको थियो । जबकि श्रीलंकाले ६ पटक उपाधि जितेको छ । यसले सन् १९८६, १९९७, २००४, २००८, २०१४ र २०२२ मा एसिया कपको उपाधि जितेको थियो । पाकिस्तानले दुई पटक एसिया कपको उपाधि जितेको छ ।
