१८ भदौ,काठमाण्डौ ।
नेपाली राष्ट्रिय क्रिकेट टोलीका ओपनर कुशल भुर्तेलले ओडिआई खेलमा १ हजार रन पूरा गरेका छन् । श्रीलंकाको कान्डीस्थित पाल्केले क्रिकेट स्टेडियममा सोमबार जारी खेलमा कुशलले १ हजार रन पूरा गरेका हुन् । कुशलले ४६ ओडिआइ खेलको ४५ इनिङस्मा हजार रन बनाएका हुन् ।
कुशलले आडिआइमा सर्वाधिक १ सय १५ रन प्रहार गरेका छन् । ओडिआईमा ६ अर्धशतक र १ शतक हानेका छन् । १०३ चौका र २० छक्का हानेका छन् । सन् २०२१ मा ओमानमा भएको पपुवा न्यु गिनीविरुद्ध खेल्दै कुशलले आडिआईमा डेब्यु गरेका थिए ।
भारतविरुद्ध ३८ रन बनाएर ओपनर कुशल भुर्तेल पवेलियन फर्केका छन् । ओपनर कुशलले २५ बलमा ३ चौका र २ छक्का हान्दै आउट भए । सार्दुल ठाकुरको बलमा विकेट किपर इसान किसानको हातबाट कुशल आउट भए ।
सोमबार खेलिएको खेलमा भारतीय फिल्डरले नेपालका दुवै ओपनर ब्याट्सम्यानको क्याच छाडेका छन् । दुवै ओपनर कुशल भुर्तेल र आशिफ शेखले तीनपटक क्याच आउट हुनुबाट जोगिए । पहिलो ओभरमा मोहम्मद सामीको बलमा श्रेयस ऐयरले नेपालका ओपनर कुशल भुर्तेलको क्याच छाडेका थिए।
त्यसपछि दोस्रो ओभरमा मोहम्मद सिराजको बलमा विराट कोहलीले आशिफ शेखको क्याच छोडेका थिए । यसैगरी पाँचौं ओभरमा कुशल भुर्तेलको क्याच विकेटकिपर इशान किशनले छाडेका थिए ।
त्यसपछि छैटौं ओभरमा सिराजको बलमा नेपाली ब्याट्सम्यान कुशल भुर्तेलले छक्का प्रहार गरेका थिए । प्रतियोगिताको ‘सुपर फोर’ चरणमा पुग्न दुवै टोलीका लागि महत्त्वपूर्ण रहेको यो खेलमा भारतले टस जिती पहिले बलिङ गर्ने निर्णय लिएको हो ।
