३० साउन , काठमाण्डौ।
प्रधानमन्त्री केपी शर्मा ओलीले सरकारको नेतृत्व गरेको एक महिना पूरा भएको छ । गएको असार १७ गते भएको एमाले र कांग्रेसबीचको ७ बुँदे सहमतिको जगमा असार ३० गते प्रधानमन्त्रीमा नियुक्त भएका ओलीले आफ्नो कार्यकालको सयदिनमा जनतालाई परिवर्तनको आभास दिने गरी काम गर्न मन्त्रीहरुलाई समेत निर्देशन दिइसकेका छन् । तर एक महिनाको बीचमा पनि सरकार विभिन्न विवादसँग जोडिसकेको छ ।
प्रधानमन्त्रीका रुपमा चौथो पटक देशको नेतृत्व गरिरहेका ओलीले यसपटक आफै नजिकका दुई छिमेकी राष्ट्रको भ्रमणमा जाने भन्दा पनि छिमेकी राष्ट्रका समकक्षीलाई नेपाल भ्रमणमा बोलाउने रणनीति बनाएका छन् । यसकै कारण उनले आफू नेपालका दुई छिमेकी भारत र चीनको भ्रमणमा जानुको साटो पहिले छिमेकीबाटै भ्रमण सुरु होस् भन्ने उद्धेश्यले भारतका समकक्षी नरेन्द्र मोदीलाई नेपाल भ्रमणको निम्तो दिएका छन् ।
भारतीय विदेश सचिवमार्फत ओलीले मोदीलाई भ्रमणको निम्तो पठाएपनि उनको निम्तो मोदीले स्वीकार गर्ने नगर्ने यकिन भईसकेको छैन् । यस्तो अवस्थामा ओलीले आफू भने छिमेकी राष्ट्रको भ्रमणको साटो अन्य मित्र राष्ट्रहरुको भ्रमणबाट आफ्नो विदेश भ्रमण सुरु गर्ने तरखरमा रहेका छन् । यसका लागि ओलीको विदेश भ्रमणका लागि तीन देश तालिकाका परेका छन् ।
ती देशबाट ओलीलाई भ्रमणको निमन्त्रणा समेत आइसकेको छ । आज मात्रै आगामी अक्टोबरमा कतारमा हुने ‘एसियन कोअपरेसन डायलग’ (एसीडी) सम्मेलनमा सहभागी हुन कतारका राजाका तर्फबाट निमन्त्रणा आएको छ ।प्रधानमन्त्री ओलीसमक्ष नेपालका लागि कतारका राजदूत मिसल मोहम्मद अल अन्सारीले आज प्रधानमन्त्री तथा मन्त्रिपरिषद्को कार्यालय, सिंहदरबारमा भेटेर निमन्त्रणा हस्तान्तरण गरेका हुन् ।
एसीडी मञ्चमा नेपालससिहत ३५ मुलुक आबद्ध छन् । मञ्चको १९औँ मन्त्रीस्तरीय बैठक गत २४ जुन, २०२४ मा इरानमा भएको थियो । नेपाल सन् २०१६ देखि यसको सदस्य छ । भेटका अवसरमा दुई देशका आपसी हित र सम्बन्धबारे छलफल भएको थियो । छलफलमा परराष्ट्र मन्त्रालयका अधिकारीलगायत सहभागी थिए । यसअघि गएको बैशाखमा कतारका राष्ट्र प्रमुखसमेत रहेका कतारका अमिर (राजा) शेख तमिम बिन हमाद अल थानी दुईदिने भ्रमणका लागि नेपाल आएका थिए ।
उनका साथमा आधा दर्जनभन्दा बढी मन्त्री पनि नेपाल आएका थिए । उनको भ्रमण द्विदेशीय सम्बन्ध कायम भएको ४५ वर्षपछि भएको थियो । यस्तै प्रधानमन्त्री ओलीले आउँदो महिना थाइल्याण्ड र अमेरिकाको भ्रमण गर्ने भएका छन् । उनी पहिला थाइल्याण्ड भ्रमण सकेर त्यतैबाट अमेरिका जाने छन् । बहुपक्षीय प्राविधिक तथा आर्थिक सहयोगका निम्ति बंगालको खाडीको प्रयास (बिमस्टेक) को छैटौं शिखर सम्मेलन सेप्टेम्बरमा थाइल्याण्डको बैंककमा हुने भएकाले त्यसमा सहभागिताका लागि प्रधानमन्त्री ओली जाने भएका हुन् ।
सेप्टेम्बर ४ वा ५ मा शिखर सम्मेलन हुने गरी अनौपचारिक छलफल भइरहेको छ । यसबीच आकस्मिक रूपमा अरू देशमा भ्रमण भएन भने प्रधानमन्त्री ओलीको चौथो कार्यकालको पहिलो विदेश भ्रमण थाइल्यान्ड हुनेछ । सेप्टेम्बर १० मा संयुक्त राष्ट्रसंघको ७९ औं महासभा हुने भएकाले थाइल्यान्ड भ्रमणलगत्तै प्रधानमन्त्री ओली अमेरिका जान सक्ने छन् । सेप्टेम्बर २४ देखि ३० सम्म महासभालाई सदस्य राष्ट्रका राष्ट्राध्यक्ष एवं सरकार प्रमुखले सम्बोधन गर्ने तालिका छ । प्रधानमन्त्री ओलीले सेप्टेम्बर २६ मा सम्बोधन गर्ने कार्यक्रम रहेको बताइएको छ।
