योगेन्द्र योगी
२४ साउन, दोहा ।
कोरनाको कारण भिसा अबधि सकिएको तथा बिदा गएको ६ महिना भित्र कतार फर्किन नसकेकाहरुको लागि लाग्ने अतिरिक्त शुल्क छुट दिने भएको छ ।
कोभिड–१९को कारणले कतारी अकामा (आइडी) वाहक कतार बाहिर फसेका आप्रवासी नागरिकहरुले पछि कतार आएर आईडी नवीकरण गर्दा जरिवाना नलाग्ने कतारको आन्तरिक मन्त्रालयले बताएको छ।
कतार सरकारको यो निर्णयसंगै कतारबाट बिदामा नेपाल गएका तथा कोरोनाको कारण कतार फर्किन नसकेका हजारौँ नेपाली श्रमिकलाई राहत पुग्ने भएको छ । कतारमा करिव ३ लाख ५० हजार नेपाली कार्यरत रहेका छन् । जसमध्ये करिव ८० प्रतिशत नेपाली निर्माणको क्षेत्रमा काम गर्दे आएका छन् ।
यता, हालसम्म कोरोना सङ्क्रमितको संख्या १ लाख १२ हजार ३८३ पुगेको छ । हालसम्म उपचारपछि निको भएर घर फर्किनेको सङ्ख्या १ लाख ९ हजार १४२ जना पुगेको छ भने मृत्यु हुनेको सङ्ख्या १८० जना पुगेको छ ।
कतारले सुरुवाती दिनदेखि नै संक्रमितको राष्ट्रियतबारे खुलाएको छैन । कतारमा के कति नेपाली कामदार कोरोनाबाट संक्रमित भन्ने दूतावाससंग पनि तथ्याङ्क छैन । कोरोना भाइरसबाट बच्न सबैलाई सावधानिको उपायहरु अपनाउन तथा अनिवार्य रुपमा माक्सको प्रयोग गर्नु पर्नेछ ।
सबैले अनिवार्य रुपमा एथेराज एप प्रयोग गर्नु पर्ने जनाएको छ । कतारले स्थिति सामान्य बन्दै गए चौथो चरण अर्थात् सेप्टेम्बरदेखि सबै प्रतिबन्ध हटाउने तयारी गरेको छ ।
