२२ पुष , काठमाण्डौ ।
नेपाली कांग्रेसभित्रको नियमित कि विशेष महाधिवेशन भन्ने विवाद अब झडपकै स्थितिमा पुगेको छ । यसैका लागि आज सानेपास्थित पार्टी कार्यालयबाहिर तनावको स्थिति सिर्जना भएको छ ।
केन्द्रीय कार्यसम्पादन समितिको बैठकमा भाग लिन वा दबाब दिन सानेपा पुगेका विशेष महाधिवेशन पक्षधर नेताहरूलाई प्रहरी र पार्टी प्रशासनले गेटमै रोकेको छ । मंगलबार सानेपामा केन्द्रीय कार्यसम्पादन समितिको बैठक बस्ने तय भएको थियो ।
बैठक सुरु हुनुपूर्व नै विशेष महाधिवेशन पक्षधर नेताहरू र केही महाधिवेशन प्रतिनिधि कार्यालय पुगेका थिए । उनीहरूले नेतृत्वलाई दवाब दिने र आफ्ना मागहरू राख्ने तयारी गरेका थिए ।
यो कुराको सुइँको थाहा पाएपछि प्रवेशमा कडाइँ गरिएको विशेष महाधिवेशन पक्षधरहरूले जनाएका छन् । पार्टी कार्यालयको गेटमा सुरक्षाकर्मीहरू परिचालन गरिएका छन् ।
भित्र बैठक चल्दै गर्दा बाहिर रहेका नेतालाई प्रवेशमा रोक लगाइएको हो । आफ्नै पार्टी कार्यालयमा नेताहरू रोकिएपछि सानेपा परिसर केही बेर नाराबाजी र तनावले तातिएको थियो ।
भित्र पस्न नपाएका नेताहरूले यसलाई ’नेतृत्वको अनुदारवादी र निरंकुश चरित्र’ भन्दै आलोचना गरेका छन्। उनीहरूले नेता विमलेन्द्र निधिविरूद्ध नाराबाजी गरेका छन्।प्रदर्शनरत कार्यकर्ताले नेताहरूलाई गाली गर्दै पार्टीलाई बन्दी बनाउन नहुने भन्दै नाराबाजी समेत गरेका छन् ।
पार्टी केन्द्रीय कार्यालय घेराउका लागि पुगेका विशेष पक्षधर केही कार्यकर्ताहरूले नेता निधि लिंक रोडबाट भित्रिने क्रममा क्रममा अवरोध पु¥याएका थिए । सो क्रममा नेता निधि र कार्यकर्ताहरूबीच चर्काचर्की भएको थियो ।
विशेष महाधिवेशन पक्षधर केन्द्रीय सदस्य मधु आचार्यले भने विशेष पक्षधरले सानेपामा घेराउ नगरेको बताएका छन् । मंगलबार बोलाइएको केन्द्रीय कार्यसम्पादन समितिको बैठकको लागि नेताहरू वैकल्पिक गेटबाट पार्टी कार्यालय प्रवेश गरिरहेका छन् ।
बिहान ११ बजे हुने भनिएको बैठक बस्न ढिला भएको छ । आजको बैठकमा ११ माघमा हुन गइरहेको राष्ट्रियसभा निर्वाचनमा पार्टीका तर्फबाट दिइने उम्मेदवारी र सम्भावित चुनावी तालमेलबारे छलफल हुने बताइएको छ ।
सोमबारको बैठकमा कार्यवाहक सभापति पूर्णबहादुर खड्काले राष्ट्रियसभा निर्वाचनमा गरिने चुनावी तालमेलबारे ‘ब्रिफिङ’ गरेका थिए । राष्ट्रिय सभामा सबैभन्दा बढी मतभार रहेको कांग्रेसले आफ्नो हैसियत अनुसारको प्रतिनिधित्व सुनिश्चित गर्न र निर्वाचन जित्न सक्ने आधार तय गर्न अन्य शक्तिहरूसँग सहकार्यको हात बढाएको हो ।
आज बैठकमा कुन दलसँग कति सिटमा तालमेल गर्ने र कांग्रेसका तर्फबाट को–को उम्मेदवार बन्ने भन्ने विषयमा औपचारिक निर्णय हुनेछ । एमालेले राष्ट्रिय सभामा ७ सिट माग्ने निर्णय गरेको छ ।
यस्तै नीतिगत स्पष्टताको अभावस् चुनावी गठबन्धन गर्ने कि नगर्ने र पार्टीको मार्गचित्र कस्तो हुने भन्नेमा महामन्त्रीद्वयले फरक मत राख्दै आएका छन् । विधानले दिएको समयसीमा कुर्नुभन्दा अगाडि नै नयाँ नेतृत्व चयन गरेर पार्टीलाई पुनर्जीवन दिने इतर पक्षको दाबी छ ।
महामन्त्री पक्षले यसअघि नै ५४ प्रतिशत महाधिवेशन प्रतिनिधिको हस्ताक्षर संकलन गरेर विशेष महाधिवेशनको वैधानिक बाटो सुरक्षित गरिसकेको दाबी गर्दै आएको छ। मंसिर १५ गते बसेको केन्द्रीय कार्यसमिति बैठकले पुस २६–२८ गतेका लागि १५ औँ महाधिवेशनको मिति तोकेपछि केही समय विवाद शान्त भएको देखिएको थियो।
उक्त मिति केवल ’देखाउनका लागि’ मात्र भएको आरोप इतर पक्षले लगाउँदै आएको थियो । पछिल्लो पटक पुस १८ गते बसेको कार्यसम्पादन समितिको बैठकले पुसको कार्यतालिकालाई पर सारेर आगामी वैशाख अन्तिम साता महाधिवेशन गर्ने निर्णय गरेपछि संस्थापन इतर समूह रुष्ट बनेको छ।
कार्यतालिका पटक–पटक सर्दा पार्टीको वैधानिकतामाथि नै प्रश्न उठ्न सक्ने र नेतृत्वले समय लम्ब्याउन खोजेको भन्दै विशेष महाधिवेशन पक्षधरहरूले आफ्नो तयारीलाई तीव्र पारेका हुन्। विशेष महाधिवेशन पक्षधरहरूले आफ्नो तयारीलाई संगठित बनाउन विभिन्न उप–समितिहरू गठन गरिसकेका छन् ।
उनीहरूले देशभरका ५४ प्रतिशत महाधिवेशन प्रतिनिधिहरूलाई आगामी पुस २६ गतेभित्र काठमाडौं आइपुग्न कडा निर्देशन दिएका छन्। सानेपाको मंगलबारको घटनाले दुई पक्षबीचको सम्बन्ध थप तितो बनाइदिएको छ ।