३ भदाै, काठमाडौँ ।
सरकारले नेपाल प्रेस काउन्सिको कार्यवाहक अध्यक्षमा दुर्गा भण्डारीलाई नियुक्त गरेको छ । सोमबारको मन्त्रिपरिषदको बैठकले यसअघि कार्यवाहक अध्यक्ष रहेकाकिशोर श्रेष्ठको जिम्मेवारी खोस्दै भण्डारीलाई नियुक्त गरेको हो ।
श्रेष्ठको कार्यकाल सकिन ४० दिन मात्रै बाँकी हुँदै नयाँ अध्यक्ष नियुक्त गरेको हो । प्रधानमन्त्रीको सरकारी निवास बालुवाटारमा बसेको बैठकले केही दिनअघि मात्र काउन्सिल सदस्यमा नियुक्त भण्डारीलाई यो जिम्मेवारी दिएको हो । भण्डारीलाई कार्यवाहक अध्यक्ष दिनका लागि काउन्सिलको नियमावली नै संशोधन गरिएको थियो । काउन्सिलका सदस्यहरूले वरिष्ठ सदस्यलाई कार्यवाहक अध्यक्षको जिम्मेवारी दिने नियमावलीको व्यवस्थालाई संशोधन गरेर मन्त्रिपरिषद्ले कार्यवाहक अध्यक्ष तोक्ने व्यवस्था राखिएको थियो ।
आफूलाई कार्यवाहकबाट हटाउने अभिप्रायले नियमावली संशोधन गरेको श्रेष्ठको आरोप छ । आफूप्रति प्रधानमन्त्री केपी शर्मा ओलीको पुरानो तुष रहेको र त्यसकै प्रतिशोध साँध्न नियमावली संसोधन गरेको उनको दावी छ । यसैबीच प्रमुख प्रतिपक्षी नेपाली कांग्रेसले नेपाल प्रेस काउन्सिलको कार्यवाहक अध्यक्ष नियुक्तिमा असन्तुष्टि जनाएको छ ।
कांग्रेसका प्रवक्ता विश्वप्रकाश शर्माले विज्ञप्ति जारी गर्दै प्रेस काउन्सिलको कार्यवाहक अध्यक्षमा प्रधानमन्त्री केपी शर्मा ओलीले आफ्नो कोटरीको व्यक्तिलाई नियुक्त गरेकोबाट सरकार नियन्त्रित प्रेसको बाटोमा श्रृंखलाबद्ध ढंगले अगाडि बढिरहेको भन्ने पुष्टि भएको उल्लेख गरेका छन् । शर्माले बुधबार जारी गरेको विज्ञप्तिमा भनिएको छ, विगतमा कुनै कमजोरी भएका थिए भने पनि त्यसलाई नजिरका रूपमा लिएर दोहो¥याउने होइन, सच्याएर काउन्सिललाई राजनैतिक आग्रहमुक्त स्वतन्त्र प्रेसको उच्च गरिमा राख्ने थलोका रूपमा परिस्कृत र विकसित गर्ने आजको समयको माग र आवश्यकता हो । तर, नियंत्रित प्रेसको बाटोमा सरकार श्रृंखलाबद्ध ढंगले कार्य गरिरहेको छ, नेपाली कांग्रेसले यसलाई गम्भीरता पूर्वक लिएको छ । भण्डारीको नियुक्तिलाई नेपालमा प्रेस स्वतन्त्रता कुण्ठित गर्ने नेकपा सरकारको पछिल्लो उदाहरण भएको कांग्रेसको ठहर छ ।
प्रेस काउन्सिलमा नवनियुक्त कार्यबाहक अध्यक्ष भण्डारी विगत २५ वर्षदेखि मोफसलमा पत्रकारिता गर्दै आएकी छिन् । झापा भद्रपुर नगरपालिका–८ मा जन्मिएकी भण्डारी हाल पोखरा महानगरपालिका–५ मा बस्दै आएकी छिन् । आमसञ्चार तथा पत्रकारितामा स्नातकोत्तर तह उत्र्तिण गरेकी उनी कानून व्यवसायी पनि हुन् । भण्डारी नेपाल पत्रकार महासङ्घको केन्द्रीय सदस्य, प्रेस चौतारी नेपालको सचिव र सञ्चारिका समूह पश्चिमान्चलको अध्यक्ष रहेकी छिन् ।भण्डारीले भने प्रेस काउन्सिलको नेतृत्वका लागि आफू हरेक हिसाबले योग्य भएको बताउँदै आएकी छिन् ।
कार्यवाहक नियुक्त गरिएको विवादलाई काउन्सिल बोर्डले अदालतमा लगेको छ । नयाँ कार्यवाहकको नियुक्ति खारेज गरेर श्रेष्ठलाई नै निरन्तरता दिन माग गर्दै सोमबार सर्वोच्च अदालतमा रिट दायर गरिएको छ ।
