२० असार, काठमाण्डौ ।
काठमाडौं महानगरपालिकाका मेयर बालेन्द्र शाह बालेनले काठमाडौं महानगरभित्र नेपाली कांग्रेसको कुनै पनि भ्रातृ संगठन नरहेको ’घोषणा’ गरेका छन् । काठमाडौं क्षेत्र नमबर ४ का प्रतिनिधिसभा सांसदसमेत रहेका नेपाली कांग्रेसका महामन्त्री गगन थापाले दुई दिन अघि एक कार्यक्रममा झोला बोकेर प्राध्यापक, कर्मचारी र विद्यार्थी विश्वविद्यालय छिर्न नपाइने भनी दिएको अभिव्यक्तिलाई उल्लेख गर्दै बालेनले उक्त घोषणा गरेका हुन्।
“नेपाली कांग्रेसको महामन्त्रीज्यूले नै भनेपछि काठमाडौं महानगरभित्रका सबै विद्यालय, शिक्षण संस्था, कार्यालय, सबैतिर कांग्रेस पार्टीको कुनै पनि भ्रातृ संगठन नभएको घोषणा गर्दछौँ । बोलेको कुरा पूरा गर्नुहोला माननीयज्यू,“ बालेनले मंगलबार फेसबुकमा लेखेका छन् ।
सोमबार स्वर्गीय गिरिजाप्रसाद कोइरालाको १००औँ जन्मजयन्तीका अवसरमा काठमाडौंमा आयोजित एक कार्यक्रममा गगनले विश्वविद्यालयलाई शतप्रतिशत राजनीतिबाट टाढा राख्नुपर्ने बताएका छन् । “हाम्रा प्राध्यापक, कर्मचारी, विद्यार्थीहरू राजनीतिक रूपमा सचेत छन् । त्यहाँ प्रतिस्पर्धा हुन्छ । त्यहाँ सबै हुन्छ । तर, दलको झोला बोकेर विश्वविद्यालय छिर्न पाइँदैन भन्ने कुरालाई अन्त्य गर्नैपर्छ । होइन भने यो पापले हामीलाई यति थिच्छ, हामीले मुक्ति पाउँदैनौँ,” गगनले भनेका थिए ।
प्रधानमन्त्री समेत सहभागि रहेको कार्यक्रममा गगनले दलको झोला बोकेर विश्वविद्यालय छिर्न पाइँदैन भन्नेकुरालाई अन्त्य नगरेसम्म विश्वविद्यालय माथि उठ्न नसक्ने बताएका थिए । उनले कुनैपनि दलको झोला बोक्ने प्राध्यापक, विद्यार्थी, कर्मचारी कसैलाई पनि विश्वविद्यालयले चिन्दैन भन्नेकुरा स्थापित गर्नुपर्नेमा जोड दिएका थिए ।
उनले विश्वविद्यालयको अवस्था झनै कहालीलाग्दो भएको र यसको दोष राजनीतिक दल र सरकारको नेतृत्व गर्नेहरुले लिनुपर्ने बताएका छन् । गगनको विश्वविद्यालय प्रतिको यही चिन्तालाई बोले जसरी नै पूरा गरेर देखाउन मेयर शाहले चुनौती दिएका हुन् । मेयर बालेनको चुनौती पछि अब नेपाली कांग्रेसका महामन्त्री थापा नैतिक संकटमा परेका छन् ।
