विराटनगर, फागुन ८
प्रमुख प्रतिपक्ष नेपाली काँग्रेसले सरकारले राष्ट्रियसभामा गरेको तीन सदस्यको सिफारिसप्रति आपत्ति जनाएको छ । काँग्रेसले आज पत्रकार सम्मेलन गरी केपी ओली नेतृत्वको सरकारले संवैधानिक व्यवस्था विपरित गएर राष्ट्रियसभामा ३ सदस्यको सिफारिस गरेको भन्दै आपत्ति जनाएको हो ।
संविधानको मूल मर्म र भावनाविपरीत भएकाले सरकारले गरेको पछिल्लो निर्णयप्रति गम्भीर आपत्ति जनाउनु परेको पार्टीका प्रवक्ता विश्वप्रकाश शर्माले जानकारी दिए । उनले अघिल्लो सरकारले संवैधानिक व्यवस्थाअनुसार राष्ट्रियसभामा गरेको सिफारिसलाई फिर्ता लिने ओली नेतृत्वको सरकारले निर्णय र त्यसलाई स्वीकार गर्ने राष्ट्रपतिको कदममा पार्टीको गम्भीर विमति रहेको पनि स्पष्ट पारे ।
प्रवक्ता शर्माले अघिल्लो सरकारले गरेको सिफारिस कार्यान्वयन नगर्ने तर वर्तमान सरकारले गरेको सिफारिस स्वीकार गर्ने राष्ट्रपति विद्यादेवी भण्डारीको कदम विवादमा तानिएको भन्दै आक्रोश पनि व्यक्त गरे ।
काँग्रेस नेतृत्वको सरकारले गरेको सिफारिस फिर्ता गर्दै ओली नेतृत्वको सरकारले गरेको सिफारिसलाई राष्ट्रपतिले स्वीकार गरेकोमा काँग्रेसको आपत्ति छ । प्रवक्ता शर्माले राष्ट्रपति जस्तो संस्थाबाट भिन्नभिन्न सरकारलाई भिन्नभिन्न चस्माले हेर्ने काम गरेकोमा आफूहरुको आपत्ति रहेको बताए ।
काँग्रेसले सरकारले संविधानको ठाडो उलंघन गरिरहे प्रतिवाद गर्न संसददेखि सडकसम्म संघर्ष गर्ने चेतावनीसमेत दिएको छ । प्रवक्ता शर्माले संविधानको कार्यान्वयनका लागि विपक्ष दललाई पनि संगै लिएर जान पनि सरकारलाई सचेत गराए । प्रवक्ता शर्माले सरकारसँगको व्यवहार उसकै निर्णय र शैलीमा निर्भर रहने पनि स्पष्ट पारे ।
