१९ वैशाख, दाङ ।
तुलसीपुरमा पार्किङ गरिराखिएको भारतीय नम्बर प्लेटको कारभित्र मृत भेटिएका तीन बालकको सनाखत भएको छ ।
तीनै बालक तुलसीपुरकै रहेको इलाका प्रहरी कार्यालय तुलसीपुरले जानकारी दिएको छ । मृतकहरू तुलसीपुर उपमहानगरपालिका–६ बरुवागाउँका भीमबहादुर परियारका ९ वर्षीय छोरा सन्दीप, सन्तोष परियारका ७ वर्षका छोरा सुवर्ण र कृष्ण परियारका ६ वर्षका छोरा करण परियार रहेको इलाका प्रहरी कार्यालय तुलसीपुरका प्रमुख डीएसपी शिवबहादुर सिंहले बताए ।
वैशाख १६ देखि हराइरहेका ती बालक तुलसीपुर उपमहानगरपालिका–६ स्याउली बजारमा पार्किङ गरिराखिएको आरजे (१सीसी) ८८५ नम्बरको भारतीय कारभित्र शनिबार राति मृत फेला परेका थिए ।
घटनामा संलग्न आशंकामा प्रहरीले तुलसीपुर उपमहानगरपालिका–६ शान्तिनगरका यादवप्रसाद गैरेलाई नियन्त्रणमा लिएको छ । घटनाको थप अनुसन्धान गर्न बाँकेबाट तालिमप्राप्त कुकुरसहितको विशेषज्ञ टोली आइपुगेको छ ।
कार उक्त स्थानमा लामो समयदेखि पार्किङ गरिराखिएको डीएसपी सिंहले बताए ।
