१० असार,एजेन्सी ।
दक्षिण कोरिया जान नपाएको भन्दै नेपाली कामदारहरू आन्दोलनमा उत्रिएका छन् । उनीहरुले ईपीएस कोरिया शाखामा धर्ना दिएका छन् । कोरियामा ५ वर्ष बसेर फर्किएर आएकाहरूले पुन जान नपाएको भन्दै ग्वार्कोस्थित ईपीएस कोरिया शाखाको कार्यालयमा धर्ना दिएका हुन् । परीक्षा दिएर पास भएको तर कोरिया जान नपाएको भन्दै उनीहरूले धर्ना दिएका हुन् ।
५०० भन्दा बढिको संख्यामा जम्मा भएर उनीहरूले धर्ना दिएका हुन । धर्नाको क्रममा झडपको अवस्था सिर्जना भएको छ । ईपीएस कोरिया शाखामा निर्देशक पुष्पराज कटुवालले कोरियाले नै फर्केर आएकाहरूलाई प्राथमिकतामा नराखेको बताए । ‘पाँच वर्ष कोरियामा काम गरेर फर्किएकाहरूले आजदेखि धर्ना दिन थालेका छन्।
कोरियाबाटै फर्केर आएकाहरू कम छनौटमा परेर आएका छन्,’ कटुवालले भने, ‘हामीले त यताबाट पास भएका सबैको लिष्ट पठाउछौ तर, रोजगारदाताले पहिलो पटक जानेलाई प्राथमिकतामा राखेको देखिन्छ । उनीहरूले अघि सारेका मागहरू श्रम, रोजगार तथा सामाजिक सुरक्षा मन्त्रालय मार्फत कोरिया सरकारसम्म पुर्याउने पहल गरेको उनको भनाई छ ।
कोरियामा एक पटक पाच वर्ष काम गरेर फर्किएकाहरू पुन परीक्षा दिएर जान पाउने व्यवस्था छ । सोहि आधारमा परीक्षा दिएर पास भएकाहरू रोजगारदाताको छनौटमा पर्न सकेका छैनन्। उनीहरूले ईपीएस कोरिया शाखाले विभेद गरेको आरोप लगाएका छन्। तर, शाखाले भने छनौटको काम रोजगारदाताले मात्र गर्न पाउने बताए ।
नेपाली श्रमिकको संख्या बढिरहेका बेला यसरी गएर फर्किएका र भाषा परीक्षा दिएर सूचीमा रहेका भने ५ प्रतिशत पनि जान पाएका छैनन् । आफूहरुलाई विभेद गरिएको उनीहरुको गुनासो छ । उनीहरुले आफ्नो रोजगारी सुनिश्चितताको माग गर्दै नारा जुलुस गरिरहेका हुन् । गत साउन यता मात्रै दक्षिण कोरियामा करिव २० हजार नेपाली रोजगारीका लागि पुगेका छन्। २० हजार लगेकोमा पहिले गएर फर्किएका ६ हजार र १४ हजार नयाँ भाषा परीक्षा पास गरेर जाने श्रमिक छन् ।
कोरियाले १६ वटा देशका लागि एकमुष्ट कोटा तोक्न थालेको छ । जुन देशले सहजरुपमा छिटो श्रमिक पठाउँछ त्यही देशबाट बढी लैजाने गरेको छ । नेपाल कोरियाको रोजाइमा पहिलो नम्बरमा पर्न थालेको छ । यसअघि देश अनुसार कोटा तोक्दा वार्षिक ७ देखि १० हजारसम्म तोकिन्थ्यो । तर नेपालबाट कोरिया पठाउने प्रक्रिया छिटो र रोष्टममा पनि पर्याप्त संख्या रहेकाले कोरियाले धेरै नेपाली लैजान थालेको हो ।
