१० बैशाख, काठमाडौ । कोरोना भाइरस नियन्त्रणका लागि सरकारले ३० बुँदे आदेश जारी गरेको छ ।
गएको सोमबार बसेको मन्त्रिपरिषदको बैठकले संक्रमण बढ्दै गएको भन्दै यसको रोकथाम तथा नियन्त्रणका लागि संक्रामक रोग ऐन २०२० को दफा २ ले दिएको अधिकार प्रयोग गरी ३० बुँदे आदेश जारी गरेको हो ।
आदेशमा स्वास्थ्य मापदण्डको पालना कडाईका साथ गर्ने, भिडभाड हुने कार्यक्रममा सहभागी हुन नदिने, आवश्यक सुरक्षा सतर्कता अबलम्बन गर्ने लगायतका विषयहरु समावेश गरिएका छन् ।
यो आदेश जारी गर्नुको कारण हामी सबै बचौँ, कोरोना हाम्रो सामुहिक सत्रु हो, त्यसैले यसलाई परास्त गर्नुपर्छ भन्ने हो । त्यसका लागि प्रत्येक व्यक्तिले इमान्दार भएर सरकारले दिएका आदेश, निर्देशन र अनुरोधलाई पालना गर्ने कुरालाई तदारुकता देखाउनुपर्छ ।
३० बुँदे आदेशलाई ७७ वटै जिल्लामा रहेका प्रमुख जिल्ला अधिकारीको नेतृत्वमा रहेको कोभिड १९ व्यवस्थापन समितिले कार्यान्वयनका लागि सहयोग पुर्याउँछ । स्वास्थ्य मन्त्रालयको टिम, पालिकाका प्रतिनिधिहरुको पनि त्यसमा संलग्नता रहन्छ ।