काठमाडौँ : सन् २०२० सुरुवाती समयदेखिनै कोरोना भाइरसको महामारीको त्रासमै बित्यो । अझै पनि यो त्रास कहिले सकिने भन्ने अन्योल छ । यो भाइरसको अर्को नाम कोभिड–१९ पनि हो । कोरोना भाइरसको महामारीले शिक्षालगायत मानव जीवनको हरेक पक्षलाई उल्लेखनीय रूपमा बाधा पुर्यायो । भाइरसका कारण शैक्षिक प्रणाली ठप्प रह्यो । जसका कारण शैक्षिक संस्थानहरू आजसम्म पनि पूर्ण रूपमा सञ्चालन हुन सकेका छैनन् ।
युनेस्कोको एक रिपोर्ट अनुसार १७१ देशका १.६ अर्ब बालबालिकालाई शैक्षिक संस्थानहरू अस्थायी रूपमा बन्द भएपछि गम्भीर असर परेको छ । नेपालको सन्दर्भमा विद्यालयदेखि विश्वविद्यालयसम्म अध्ययनरत ९० लाख विद्यार्थीहरू कोभिड–१९ को त्रासका कारण घरमै बस्नुपर्ने बाध्यता बन्यो ।
चीनको बुहानबाट फैलिएको कोरोना भाइरस नेपालमा गत माघ ७ गते चीनबाटै अध्ययन गरी नेपाल फर्केका एक विद्यार्थीमा पहिलो पटक देखिएको थियो । त्यसपछि, चैत ११ गतेदेखि सुरु भएको लकडाउन भदौसम्म रह्यो । बालबालिकाहरू घरमै बस्नुपर्दा उनीहरूको सिकाईमा नकरात्मक असर पर्नेदेखि मानसिक समस्या देखापर्न थल्यो । संकटमा विद्यालयहरूले विभिन्न वैकल्पिक माध्यमको प्रयोग गरी बालबालिकालाई केही हदसम्म घरबाटै शिक्षा उपलब्ध गराउने नयाँ अभ्यास प्रयोग समेत भयो ।
चैतमा तय गरिएको एसइई ६ महिनापछि धकेलियो कक्षा ११ र १२ को परीक्षा ८ महिनापछि धकेलिएको थियो । यस्तै विश्वविद्यालयका परीक्षाहरू समेत ६ महिना पछि धकेलिए । यसका कारण नेपालका विद्यालयदेखि विश्वविद्यालयसम्मका सम्पूर्ण शैक्षिक गतिविधिमा ६ महिनासम्म ठप्प भए । यस प्रभावलाई कम गर्नका लागि शिक्षा, विज्ञान तथा प्रविधि मन्त्रालयले बालबालिकाको सिकाइलाई निरन्तरता दिन असारदेखि विभिन्न निर्देशिका जारी गर्दै विद्यार्थीलाई शैक्षिक गतिविधिसँग जोड्न हरेक प्रयास गर्यो ।, यो समाचार आजको नागरिक दैनिकमा छ ।
