२८ जेष्ठ, एजेन्सी ।
योग गुरु रामदेवले कोरोना भाइरसविरुद्धको खोप आफूले पनि लगाउने घोषणा गरेका छन्।
यसअघि एलोपेथिकलगायत आधुनिक चिकित्सा पद्धतिको विरोधमा अभिव्यक्ति दिएपछि उनी आलोचित भएका थिए।
एलोपेथिकलगायत आधुनिक चिकित्सा पद्धतिको विरोध गरेपछि आलोचित बनेका रामदेवले अब छिट्टै आफूले पनि कोरोनाविरुद्धको खोप लगाउने घोषणा बिहीबार गरेका हुन्।
समाचार एजेन्सी पिटिआईका अनुसार रामदेवले डाक्टरहरुलाई ‘धर्तीमा रहेका ईश्वरका दूत’को संज्ञा पनि दिएका छन्।
यसअघि उनले योग तथा आयुर्वेद उपचार पद्धति अपनाउने व्यक्ति कोरोनाबाट सुरक्षित रहने र उसलाई कोरोनाको खोप आवश्यक नपर्ने अभिव्यक्ति दिएका थिए। रामदेवको यो अभिव्यक्तिको व्यापक विरोध भएको थियो।
चिकित्सकहरुले उनको अभिव्यक्तिलाई लिएर निन्दा गरेका थिए। त्यसपछि बाबा रामदेवले सबै नागरिकले कोरोना भाइरसविरुद्धको खोप लगाउनुपर्ने धारणा व्यक्त गरेका हुन्।
रामदेवले सबै नागरिकलाई खोप दिने भारतका प्रधानमन्त्री नरेन्द्र मोदीको घोषणाको स्वागत गर्दै यसलाई सरकारको ऐतिहासिक कदम पनि भनेका छन्।
पिटिआईका अनुसार हरिद्वारमा रामदेवले संवाददाताहरुसँग भने, ‘खोपको दुवै मात्रा लगाउनु भयो र योग अनि आयुर्वेदको साथ लिनुभयो भने तपाईँले कोरोनाविरुद्ध दुई गुणा बढी शक्ति प्राप्त गर्नु हुने छ।
यो दुवैले तपाईँसँग सुरक्षा कवचका रुपमा काम गर्ने छ र कसैको पनि कोरोनाका कारण मृत्यु हुने छैन।’
