२९ साउन, विराटनगर । कोशी प्रदेशका मुख्यमन्त्री हिक्मतकुमार कार्कीले प्रदेश सरकारले धेरै राम्रो काम गरेको दाबी गरेका छन् । मंगलबार मोरङको उर्लाबारीमा बलराम तथा लक्ष्मीदेवी गड्तौला प्रतिष्ठानले आयोजना गरेको दौतरी तथा जेष्ठ नागरिक सम्मान कार्यक्रममा बोल्दै उनले यस्तो जिकिर गरेका हुन् ।
मुख्यमन्त्री कार्कीले प्रदेश सरकारले धेरै राम्रो काम गरिरहेको जिकिर गर्दै केही समूह यसलाई बदनाम गर्न लागिरहेको आरोप लगाए । कुनै नेता मन परेन भन्दैमा प्रदेश खारेज गर्नुपर्छ भनेर आवाज उठाउनु सान्दर्भिक नहुने उनको भनाइ छ ।
‘कसैले नेता मन परेन भनेर प्रदेश खारेज गर्नुपर्छ भन्नुहुन्छ, कसलै छोराछोरीलाई जागिर लगाइदिनस् भनेर गाली गर्नुहुन्छ, कसैले व्यक्तिगत स्वार्थ पुरा गर्न हामीलाई गाली गर्नुहुन्छ,’ उनले भने, ‘यस्ता कुराले कसैलाई पनि फाइदा गर्दैन, त्यसैले सबै मिलेर प्रदेशलाई बलियो बनाउन लाग्नुपर्छ ।’
उनले संघीयता मान्दिनँ भन्नु भनेको संविधान च्यात्छु भन्नुसरह भएको बताए । संविधानमा नै प्रस्टसँग संघीयताका विषयमा उल्लेख भएको बताउँदै कार्कीले संघीयता हट्नेबित्तिकै मुलुकमा अर्को द्वन्द्व सुरु हुने बताए ।
यस्तै कार्कीले जेष्ठ नागरिक सम्मान कार्यक्रममा सहभागी हुन पाउँदा आफूलाई तीर्थव्रत गएजस्तै लागेको बताए ।
