१२ भदौ, विराटनगर ।
डेनमार्कका सेन्ट्रल मिडफिल्डर क्रिस्टियन एरिक्सन सन् २०२१ मा भएको युरोकपका दौरान ढलेको खेलप्रेमीलाई अवगत नै होला । युरोकपअन्तर्गत समूह चरणको खेल चलिरहँदा हृदयघातका कारण मैदानमै ढलेपछि उनलाई तत्कालै अस्पताल पु¥याइएको थियो ।
उपचारका क्रममा एरिक्सनले केही समय मैदानबाहिर बस्नु परेको थियो । उपचारपछि चिकित्सकले फुटबलमा नर्फन आग्रह गरेको भए पनि एरिक्सनले टेरेनन् । मैदानमा अचेत हुनुअघि इटालियन क्लब इन्टर मिलानका लागि व्यवसायिक फुटबल खेल्ने गरेका एरिक्सन केही महिनाका लागि भए पनि ब्रेन्टफर्ड फर्किए ।
ब्रेन्टफर्डबाट उनले ११ खेल खेलेर एक गोल गरे । हाल ३२ वर्षीय एरिक्सनले प्रिमियर लिगको सर्वाधिक धेरै उपाधि जित्ने टोली म्याचेस्टर युनाइटेडबाट खेलिरहेका छन् । युनाइटेडबाट ७२ खेल खेलेका उनले तीन गोलसमेत गरेका छन् । राष्ट्रका लागि पनि उनले खेलिरहेका छन् ।
एरिक्सनजस्तै मैदानमा ढलेका थिए, उरुग्वेका डिफेन्डर जुवान इज्किुइर्डो । हृदयघातकै कारण खेल्दाखेल्दै ढलेका २७ वर्षीय जुआन भने कहिल्यै नउठ्नेगरी अस्ताए । एरिक्सनजस्तो मैदान फर्किन पाएनन्, उनले ।
गत २२ अगस्टमा दक्षिण अमेरिकी क्लबहरूबीचको प्रतियोगिता कोपा लिबर्टाडोरेसअन्तर्गत अन्तिम १६ को दोस्रो लेगअन्तर्गत भिड्दै थिए, उरुग्वेको शीर्ष डिभिजन क्लब नेसनलले ब्राजिलका साओ पाउलो क्लब । ब्राजिलको मुरुम्बीमा भएको खेलको ८४औं मिनेटमा जुआन अचेत भएर ढलेका थिए ।
दुवै टोलीका खेलाडीको अपिलमा तत्काल स्वास्थ्यकर्मीले एम्बुलेन्समा हाले उनलाई अल्बर्ट आइन्टाइन हस्पिटल पु¥याएका थिए । तर, उपचारका क्रममा पाँच दिनपछि मंगलबार डिफेन्डर जुआनको निधन भएको छ । सामाजिक सञ्जाल ‘एक्स’मा एक विज्ञप्तिमार्फत क्लबले आधिकारिक पुष्टि गर्दै जुआनको निधनप्रति समवेदना प्रकट गरेको छ ।
अस्पतालले मंगलबार कार्डियक एरिथमियासँग सम्बन्धित कार्डियोरेस्पिरेटरी अट्याकका कारण उनलाई बचाउन नसकेको जानकारी दिएको छ । शुक्रबार अचेत भएका उनलाई आइतबारदेखि भेन्टिलेटरमा राखेर उपचार थालिएको थियो । उनको निधनका कारणा उरुग्वेको पहिलो र दोस्रो डिभिजन फुटबल लिगहरू एक साताका लागि स्थगन गरिएको छ ।
नेसनललाई २–० गोलले हराउँदै अन्तिम आठमा प्रवेश गरेको साओ पाउलोका खेलाडीहरूले आइतबार भिक्टोरियासँगको खेल जितेपछि जुआनलाई सहयोग गर्न अपिल गर्दै जर्सीमा उनको नाम राखेर खेलेका थिए ।
जुआनले व्यवसायिक फुटबलको सुरुआत २०१८ मा स्थानीय क्लब सेरोबाट गरेका थिए । सोही वर्ष पेनारोल क्लबमा आबद्ध भएका उनी त्यहाँ अपेक्षाअनुसार खेल खेल्न नपाएपछि मोन्टेभिडियो वान्डरर्स सरेका थिउ ।
सन् २०२२ मा उनी नेसनलमा आबद्ध भए । त्यहाँ एक खेल खेलेर उनी स्थानीय लिभरपुल क्लबमा अनुबन्ध भए । लिभरपुलले इतिहासमै पहिलोपटक सन् २०२३ मा उरुग्वेको लिग उपाधि जितेको थियो, उक्त लिगमा उनी लिभरपुलका सर्वोत्कृष्ट खेलाडी घोषित् भएका थिए ।
