१९ फागुन , विराटनगर।
सप्तरीको फत्तेपुरमा बाघ गाउँ पसेको छ। आज बिहान करिब ७ बजेतिर सप्तकोशी नगरपालिका वडा नम्बर– १ फत्तेपुरको इलाका वन कार्यालय नजिकैबाट बाघ गाउँ छिरेको हो।
बाघले केही व्यक्तिलाई आक्रमण गरेको छ।बिहानै गाउँ पसेको बाघलाई नियन्त्रणमा लिन डिभिजन वन कार्यालय, इलाका वन कार्यालय फत्तेपुर र कोसी टप्पु वन्यजन्तु आरक्षको टोली परिचालित भएको छ।
तर अझैसम्म नियन्त्रणमा लिन नसकिएको जिल्ला प्रहरी कार्यालय सप्तरीले जानकारी दिएको छ । ठूलो संख्यामा रहेको टोलीले बाघलाई नियन्त्रणमा लिने प्रयास गरे पनि अहिलेसम्म नसकेको डिभिजन वन कार्यालय सप्तरीका सूचना अधिकारी बैजनाथ मण्डलले जानकारी दिएका छन् ।
शिवालय टोलमा रहेको रिजन गोसाईंको घरमा छिरेर बाघले उनी माथि आक्रमण गरेको छ। त्यहाँबाट बाघलाई नियन्त्रणमा लिन डार्ट गोली हानिएको भए पनि बाघ नियन्त्रणमा आउन सकेन।
त्यहाँबाट निस्किएको बाघले गणेश खत्रीको घरमा पुगेर उनी माथिसमेत आक्रमण गरेको छ। उक्त बाघले लगत्तै स्थानीय कृष्ण विष्टलाई आक्रमण गरेको रक्तमाला सामुदायिक वनका अध्यक्ष इन्द्रप्रसाद लुइँटेलले जानकारी दिएका छन् ।
अहिले बाघ स्थानीय गोपाल ओझाको पछाडिको गोठमा बसेको फत्तेपुर प्रहरीले जानकारी दिएको छ । बाघले मोटरसाइकल र अन्य सामानहरुमा पनि क्षति पुर्याएको प्रहरीले बताएको छ ।बाघ गाउँमा पसेपछि सप्तकोसी नगरपालिका– १ फत्तेपुर, शिवालय टोलका नागरिक त्रसित भएका छन्।
घाइतेमध्ये कृष्ण विष्टलाई उपचारको लागि इटहरी लगिएको छ भने दुई जनाको स्थानीय स्वास्थ्य संस्थामै उपचार भइरहेको छ। कोशी टप्पु वन्यजन्तु आरक्षबाट बाघ आएको हुन सक्ने अनुमान गरिएको छ ।
