विराटनगर,असोज २२
विराटनगर महानगरपालिकाभित्र कार्यरत काज शिक्षकहरु आन्दोलनमा उत्रिएका छन् । महानगरपालिकाभित्र सामुदायिक विद्यालयमा काजमा खटिएका शिक्षकहरुले चार महिनायताको तलब सुविधा नपाएपछि आन्दोलन थालेका हुन् ।
तलबको माग गर्दै आन्दोलनमा उत्रिएका शिक्षकहरु सहित नेपाल शिक्षक महासंघसहित शिक्षकसम्वद्ध संघसंगठनहरुले सोमबार शिक्षा विकास तथा समन्वय इकाई मोरङको लेखा, प्रशासन र इकाइ प्रमुखको कार्यकक्षमा तालाबन्दी गरेका छन् । समन्वय इकाइमा तालाबन्दीपछि उनीहरुले विराटनगर महानगरपालिकामा धर्ना दिएका छन् ।
तलब नपाएपछि आन्दोलनमा उत्रिएको नेपाल शिक्षक महासंघ विराटनगर नगरसमितिका अध्यक्ष वेदुकुमार खतिवडाले बताए ।उनले मंगलबारसम्म पनि तलब निकासा गर्ने आश्वासन नदिए बुधबारदेखि महानगरपालिकामा अनिश्चितकालीन धर्ना र घेराउ गर्ने बताए ।
महानगरपालिकाका सामुदायिक विद्यालयमा खटाईएका १९ जना शिक्षक हरुले तलब नपाएका हुन् । शिक्षकहरुले आफूहरुलाई खटाइएको विद्यालयमा शिक्षण गरिरहे पनि समन्वय इकाइ र महानगरपालिकाले गैरजिम्मेवारपूर्ण व्यवहार गरेर तलब निकासा रोकेको आरोप लगाएका छन् ।
उनीहरुले शिक्षकहरुको खाइपाई आएको तलब भत्ता रोकिनु दुखद भएको बताउँदै समन्वय इकाईले कार्यरत विद्यालयबाटै तलव भत्ता लगायतका सुविधा पाउने गरी काजमा खटाइएका शिक्षकको विवरण स्थानीय तह र माथिल्लो निकायमा नपठाई आलटाल गरिरहेको गुनासो गरे ।
तलब माग गर्दा महानगरपालिकाले समन्वय इकाइबाटै शिक्षक कर्मचारीको अद्यावधिक अभिलेख प्राप्त नभएका कारण तलव माग गर्न नसकिएको जवाफ दिंदै आएको छ ।
