९ चैत्र, एजेन्सी ।
फिलिपिन्स र अमेरिकाले अर्को साता संयुक्त सैन्य अभ्यास गर्ने भएका छन्।
अमेरिकी अधिकारीहरुले दिएको जानकारीअनुसार द्वीपसमूह राष्ट्रमा अमेरिकाले अहिलेसम्मकै सबैभन्दा ठूलो संयुक्त सैन्य अभ्यास सुरु गर्न लागेको हो।
बढ्दो चिनियाँ प्रभाव सामु आफ्नो बलियो रक्षा सम्बन्ध देखाउने अभिप्रायले सो अभ्यास गर्न लागिएको विश्लेषण गरिएको छ। लगभग ९ हजार फिलिपिनो र अमेरिकी सैनिकले लुजोनको मुख्य टापुमा १२ दिनसम्म सो युद्धाभ्यासमा भाग लिनेछन्।
मार्च २८ मा सुरु हुने उक्त अभ्यासमा सामुद्रिक सुरक्षा, लाइभ फायर तालिम, आतङ्कवाद प्रतिरोध, मानवीय सहायता र विपद् राहतलगायत अन्य विषय समेटिने अमेरिकी दूतावासले विज्ञप्तिमार्फत जनाएको छ।
“(दुवै पक्षले) साझा रणनीति, प्रविधि र प्रक्रियाहरू विस्तार र अगाडि बढाउनुका साथै तालिम दिनेछन् जसले हाम्रो प्रतिक्रिया क्षमता र वास्तविक–विश्व चुनौतीको तत्परतालाई बलियो बनाउँछ,” अमेरिकी तेस्रो समुद्री डिभिजनका कमाण्डर मेजर जनरल जे बार्गेरोनले बताएका छन्। लामो समयका सहयोगी बीचको हालैका युद्धाभ्यास दक्षिण चीन सागरमा सम्भावित द्वन्द्वमा केन्द्रित छन्।
चीनले विवादित चट्टानमा कृत्रिम टापुहरू निर्माण गर्ने र तिनीहरूमा हतियार स्थापना गरेर आफ्नो अडानलाई बलियो बनाएको आरोप लाग्ने गरेको छ। फिलिपिन्स, ब्रुनाई, मलेसिया, ताइवान र भियतनामले पनि दक्षिण चीन सागरमा आफ्नो दाबी गर्दै आएका छन्।
गत साता फिलिपिन्सले चिनियाँ नौसेनाको जहाजलाई आफ्नो द्वीपसमूहको पानीमा अवैध रूपमा तरिरहेको दाबी गरेपछि मनिला र बेइजिङबीचको तनाव बढेको थियो। युक्रेनमा रुसले आक्रमण गरिरहेको समयमा यो सैन्याभ्यास हुन लागेको हो।
जहाँ अमेरिका र उसका सहयोगीहरूले युक्रेनलाई रक्षात्मक हतियार उपलब्ध गराउँदै आएका छन् र मस्कोमाथि आर्थिक प्रतिबन्ध पनि लगाएका छन्।
फिलिपिन्सका राष्ट्रपति रोड्रिगो डुटेर्टेले सोमबार अमेरिकासँगको सुरक्षा गठबन्धनका कारण द्वन्द्वमा ‘संलग्न’ भएको बताएका छन्। सो गठबन्धनमा पारस्परिक रक्षा सन्धि र अमेरिकी सेनालाई फिलिपिन्सको सैन्य क्याम्पमा रक्षा उपकरण र आपूर्ति भण्डारण गर्न अनुमति समावेश छ।(रासस–एएफपी)
