१ कार्तिक, काठमाण्डौ।
बडादशैंको फूलपातीको अवसर पारेर रिलिज भएका तीन नेपाली फिल्महरू प्रदर्शनको दोस्रो हप्तामा प्रवेश गरेका छन्। ’छक्का पञ्जा ५’, ’१२ गाउँ’ र ’ज्वाइँ साब’ आजबाट दोस्रो सातामा प्रवेश गरेका हुन्। यीमध्ये आक्रामक व्यापार गरिरहेका ’छक्का पञ्जा ५’ र ’१२ गाउँ’ लाई क्युएफएक्सले सुपरहिट घोषणा गरिसकेको छ।
उता आक्रमक ब्यापार गरिरहेको ‘छक्का पञ्जा–५’को प्रचारमा नै साउदी स्थित दूतावास जुटेको छ । दूतावासले आफ्नो आधिकारिक फेसबुक पेजमार्फत साउदी अरबमा उक्त चलचित्र प्रदर्शन हुन लागेको भन्दै त्यहाँ रहेका नेपालीलाई हेर्न अनुरोध गरेको छ ।
“साउदी अरबमा बस्ने नेपाली दाजुभाइ दिदीबहिनीहरूका लागि जानकारी,” दूतावासले आफ्नो फेसबुक पेजमा भनेको छ, “१७ अक्टोबर २०२४ देखि साउदी अरबका विभिन्न सहरमा पहिलोपटक नेपाली चलचित्र ‘छक्का पञ्जा–५’ एकै साथ प्रर्दशन हुने भएकाले नजिकको सिनेमा हलमा गएर चलचित्र हेर्न सकिने व्यहोरा जानकारी गराइन्छ ।”
दूतावासले साउदी अरबमा ‘छक्का पञ्जा–५’ प्रशर्दन हुने सहर र चलचित्र हलको पूर्णविवरण र थप जानकारी आवश्यक परे सम्पर्क गर्न भन्दै एक व्यक्तिको नाम र मोबाइल नम्बर पनि उपलब्ध गराएको छ । दूतावासले आफ्नो फेसबुक पेजमा ‘छक्का पञ्जा–५’ को पोस्टर पनि राखेको छ ।
नेपालीहरुका समस्या समाधानमा अग्रसरता नलिने दूताबास चलचित्रको प्रचारमा लागेको भन्दै आलोचना भएको छ । ‘छक्का पञ्जा–५’ दीपाश्री निरौलाले निर्देशन गरेको चलचित्र हो । दीपकराज गिरी, केदार घिमिरे, वर्षा शिवाकोटी, प्रकाश घिमिरेलगायत कलाकारको अभिनय छ ।
सुरूका दिनमा राम्रो अकुपेन्सी नदेखिएको ’ज्वाइँ साब’ ले पनि पिकअप लिइरहेको छ। अहिले यो फिल्म प्राप्त शोमा राम्रो अकुपेन्सीमा चलिरहेको निर्माण पक्षले जनाएको छ। व्यापारको कुरा गर्दा दीपकराज गिरी र दीपाश्री निरौलाको फिल्म ’छक्का पञ्जा ५’ ले ११ करोडमाथिको ग्रस कलेक्सन गरेको जनाइएको छ।
विराज भट्टका बाबु–छोराको फिल्म ’१२ गाउँ’ को ग्रस कलेक्सन ७ करोडमाथि पुगेको अनुमान गरिएको छ। यद्यपि, आधिकारिक रूपमा बक्स अफिस कलेक्सनको रिपोर्ट सार्वजनिक गरिएको छैन। यसका वितरक गोविन्द शाहीले दोस्रो हप्तामा १२ गाउँ देशभर हाउसफुल रहेको बताएका छन् ।
जितु नेपाल र नीति शाह अभिनीत ’ज्वाइँ साब’ ले पनि ग्रस कलेक्सन रिपोर्ट सार्वजनिक गरेको छैन। दोस्रो सातामा फिल्मले पाएको शोको कुरा गर्दा क्युएफएक्स चेनमा काठमाडौंका आउटलेटमा ’छक्का पञ्जा ५’ र ’१२ गाउँ’ को शो बराबरजस्तो छ।
शुक्रबारका लागि क्युएफएक्सका काठमाडौंका आउटलेटमा ’१२ गाउँ’ को शो बढी छ। दोस्रो ठूलो मल्टिप्लेक्स चेन आईएनआई सिनेमाजले बिहीबारका लागि ’छक्का पञ्जा ५’ लाई १५ शो दिएको छ भने ’१२ गाउँ’ ले १२ शो पाएको छ।
आईएनआईमा ’ज्वाइँ साब’ लाई ३ शो दिइएको छ। बिग मुभिजमा ’१२ गाउँ’ अगाडि देखिएको छ। यहाँ बिहीबारका लागि ’छक्का पञ्जा ५’ ले ६ र ’१२ गाउँ’ ले ७ शो पाएको छ। यहाँ ’ज्वाइँ साब’ लाई १ शो दिइएको छ।
सुरूमा शो बाँडफाँट गर्दा क्युएफएक्समा ’१२ गाउँ’ ले भन्दा ’छक्का पञ्जा ५’ ले धेरै शो पाएको थियो। दर्शकको साथ पाएपछि ’१२ गाउँ’ ले विस्तारै शो बढाउँदै लगेको हो। उता असोज १७ गते रिलिज फिल्म ’बेहुली फ्रम मेघौली’ लाई भने निर्माताले बिहीबारदेखि हलबाट उतारेका छन्।
यसका निर्माता एवं अभिनेता निश्चल बस्नेतले फिल्मले राम्रो प्रतिक्रिया, दर्शकको राम्रो साथ पाइरहेको भए पनि हलले शो घटाएको र हिन्दी फिल्मलाई शो दिएको भन्दै असन्तुष्टि व्यक्त गरेका थिए। यो फिल्मलाई स्वस्तिमा खड्का र निश्चल बस्नेतले निर्माण गरेका हुन्। फिल्मलाई चाँडै ओटिटी प्लेटफर्ममा रिलिज गरिने जनाइएको छ।
