१८ असार, काठमाण्डौ ।
काठमाडौँ महानगरपालिका भित्रका विद्यालयहरुलाई कानूनले व्यवसथा भएवमोजिमको छात्रबृत्ति अनिवार्य उपलब्ध गराउन भन्दै छात्रबृत्ति पाएका विद्यार्थीहरुको सूची समेत मगाएको महानगरले अब महानगरभित्रका निजी विद्यालयले दिने छात्रवृत्तिको परीक्षा आफैँले लिने भएको छ।एसईईको परीक्षाफल प्रकाशन हुने अन्तिम तयारी भईरहेको समयमा मेयर बालेन्द्र शाह बालेनले फेसबुकमार्फत यस्तो जानकारी गराएका हुन्।
उनले लेखेका छन्– काठमाडौँ महानगरपालिका शिक्षा ऐन, २०७५ तथा शिक्षा नियमावली, २०७४ मा व्यवस्था भए बमोजिम काठमाडौँ महानगरपालिका अन्तर्गतका निजी विद्यालयले कक्षा ११ का विद्यार्थीहरूका लागि वितरण गर्ने छात्रवृत्तिको लागि विद्यार्थी छनोट सम्बन्धी परीक्षा शैक्षिक सत्र २०८०÷०८१ देखि काठमाडौँ महानगरपालिकाले आफै नै सञ्चालन गरी सामुदायिक विद्यालयमा अध्ययन गरेको , जेहेन्दार, पिछडिएको क्षेत्र, जनजाती, आदिवासी,गरिव लगायतका छनोटका आधार तयार गरी योग्यताक्रमका आधारमा छात्रवृत्ति प्रदान गरिने व्यहोरा सम्बन्धित सबैको जानकारीको लागि अनुरोध छ ।
यसअघि मेयर बालेनले महानगरभित्रका निजी विद्यालयका शिक्षकलाई पनि सरकारीसरह तलब दिनुपर्ने बताएका थिए। मेयर साहले कुनै विद्यालयले सामुदायिकसरह तलब नदिए महानगरमा उजुरी गर्न पनि आह्वान गरेका थिए।
काठमाडौँ महानगरपालिका विद्यालय शिक्षा व्यवस्थापन नियमावली, २०७४ को नियम ६८ मा शिक्षक तथा कर्मचारीको तलब भत्ता, निवृत्तिभरण, उपदान लगायतका अन्य सुविधा खाइपाइ आएकोमा नघट्ने गरी संघीय शिक्षा कानूनमा तोकिए बमोजिम हुने उल्लेख गरिएको भन्दै बालेनले सोही बमोजिम काठमाडौं महानगरपालिकाका सामुदायिक विद्यालयका शिक्षकहरूले प्राप्त गर्ने निम्न अनुसारको तलब सुविधा संस्थागत विद्यालयको शिक्षकलाई पनि प्राप्त गराउन काठमाडौं महानगरपालिकाका सम्पूर्ण संस्थागत विद्यालयहरूलाई सूचित गराएका छन्। तर बालेनको उक्त निर्णयप्रति संस्थागत (निजी) विद्यालयले विरोध गरेको छ ।
