काठमाडौँ : जयनगर–जनकपुर खण्डमा रेल सञ्चालनका लागि विभिन्न पदमा कर्मचारी माग गरिएपछि ठूलो संख्यामा आवेदन परेको छ । भदौ २९ मा १ सय २९ कोटाका लागि गरिएको विज्ञापनमा ३२ हजारले आवेदन दिएका छन् । आवेदन दिने समय मंगलबार सकिएको छ ।
कार्यालय सहयोगीदेखि अधिकृतसहित २९ पदमा विज्ञापन गरिएको नेपाल रेलवे कम्पनीका महाप्रबन्धक गुरु भट्टराईले जानकारी दिए । ‘आवेदन दिने समय सकिएको छ,’ उनले भने, ‘अब छिट्टै भर्ना प्रक्रिया टुंग्याउँछौं ।’ सबैको नाम र कुन पदका लागि आवेदन आएको हो, सबै नाम सिस्टममा इन्ट्री गराइनेछ । ‘शैक्षिक योग्यता, अनुभव र तालिमबारे पनि हेरिनेछ,’ उनले भने, ‘कार्यविधिअनुसार नाम इन्ट्री गराइनेछ ।’ उनका अनुसार त्यसबाट मेरिट लिस्ट निकालिनेछ ।
‘यो सबै प्रक्रिया सकेपछि अन्तर्वार्ताका लागि बोलाइनेछ,’ उनले भने, ‘तर एक हप्ताभन्दा बढी इन्ट्री गर्न समय लाग्ने देखिन्छ ।’ त्यसपछि एक हप्ताको सूचना निकालेर अन्तर्वार्ताको प्रक्रिया थालिनेछ । ‘कर्मचारी भर्ना दसैंअघि नै सक्ने भनेर लागिपरेका छौं,’ उनले भने, ‘नसकिए दसैंलगत्तै प्रक्रिया सुरु गरेर सक्नेछौं ।’ गत फागुनमा २६ जना प्राविधिक नेपालबाटै मागिएको थियो । १५ दिनको समय दिएर सूचना निकाल्दा एक जनाको पनि आवेदन परेन । ‘नेपालबाट प्राविधिक कर्मचारी माग्दा कसैबाट आवेदन परेन,’ उनले भने, ‘त्यसैले नेपालबाट आवेदन नपरेपछि २६ जना विदेशी कर्मचारी भर्ना गर्ने सम्बन्धमा मन्त्रिपरिषद्बाट पास भइसकेको छ ।’ त्यसैका आधारमा इन्डियन रेलवेसँग कुरा भइरहेको उनले बताए । ‘अब सबै कर्मचारी एकैचोटि भर्ना गरेर टुंग्याउने प्रक्रियामा छौं,’ उनले भने, ‘त्यस्तै निर्माण भएको रेल ट्र्याक, स्टेसन र स्टाफ भवन हस्तान्तरण पनि चाँडै हुनेछ ।’ अहिले कोभिड–१९ ले गर्दा समस्या भएको छ ।,याे समाचार कान्तिपुर दैनिकमा छापिएकाे छ ।
