१४ असार, काठमाण्डौ ।
अख्तियारको छानविनमा रहेको पशुपतिनाथको मन्दिरको सुनको जलहरी नापतौलपछि पुनस्थापित गरिएको छ । जलहरीमा न्युन सुन भएको तथा विभिन्न ब्यक्तिहरुको नाम कुदिएको भन्दै संसदमा समेत छानविनको माग भईरहेका बेला पशुपतिको जलहरीका विषयमा काठमाडौं महानगरपालिकाका मेयर बालेन्द्र शाह बालेनले कवितात्मक भावसहित टिप्पणी गरेका छन् ।
उनले सामाजिक संजालमा कविताकै शैलीमा लेखेका छन्, तिम्रो माया पशुपतिको जलहरी जस्तै, जती घटे पनि, लाग्छ । सून , चादी , हीरा जे होस , नेपालको कानुन जस्तै , जता हराए पनि, कस्ले माग्छ ? सुनको परिमाणमा गडबडी भएको उजुरी परेको दुई वर्षपछि अख्तियार दुरूपयोग अनुसन्धान आयोगकका कर्मचारी जलहरीको तौल नाप्न आइतबार पशुपति पुगेका थिए।
सोमबार बिहान २ बजे निकालिएको जलहरी बुधबार साँझ ६ बजेबाट ११ घण्टा लगाएर पुनर्स्थापित गरिएको छ । आइतबार अख्तियारले पुरातत्व, गुणस्तर तथा नापतौल विभाग, सुन चाँदी व्यवसायी महासंघ, पशुपति क्षेत्र विकास कोषका पदाधिकारी, जनप्रतिनिधिसहित २७ जनाको रोहवरमा पशुपतिको शिवलिङबाट २०७८ फागुनमा राखिएको सुनको जलहरी निकालेर नापजाँच गरेको थियो। गर्भगृहबाट सुनका ३ वटा रिङ, बासुकी नाग १, जलधारा १, जलहरी ३, नाग ३ सहित ११ पाता सुन निकालेर तौलिएको थियो।
यसको तौल १०६.४३२५ किलो रहेको बताइएको छ। त्यस्तै प्रयोगमा नआएको भनिएको सुनका २७ थान किला, पाता १, तार ७, ५ थान टुक्रा पनि नापजाँच भएको थियो। र, त्यसको परिमाण १.०३५७५ किलो रहेको बताइएको छ। यो सबै परिमाण जोड्दा १०७.४६८२५ किलो हुन्छ। पशुपति क्षेत्र विकास कोषले जलहरीमा १०७ किलो ७९८ ग्राम सुन प्रयोग भएको बताएको थियो।
त्यसका लागि उसले नेपाल राष्ट्र बैंकबाट १०३ किलो ७९३.१०० ग्राम शुद्ध सुन खरिद गरेको बताएको छ। त्यसमा तामा २ किलो ८८८ ग्राम, चाँदी १ किलो २५३ ग्राम र जिन्क १२ ग्राम ७५ मिलि ग्राम मिसावट गरिएको उसको भनाइ छ। २०७८ फागुनमा अदालतको आदेश छल्न छिटो तयार पारी ९६ किलो ८२२ ग्रामको जलहरी हालिएको र त्यसको मुचुल्का तयार गरेको कोषले बताउँदै आएको थियो।
रिङ र बाँकी सुनको तौल १० किलो ९७६ ग्राम रहेको उसको दाबी थियो। महालेखापरीक्षकको ५९ औं वार्षिक प्रतिवेदन २०७९ले यसबारे प्रश्न उठाएको थियो। अहिले अख्तियारले सुनको परिमाण पुगेको नपुगेकोबारे खुलाएको छैन। केही दिनपछि विवरण सार्वजनिक गर्ने अख्तियारले बताएको छ ।
