३० भदौ, दमक ।
राष्ट्रिय बाल दिवसका अवसरमा नगर बाल सञ्जाल दमकले ख्याति प्राप्त व्यक्तिहरुसँग उनीहरुको बाल्यकालका बारेमा बालानुभव वार्तालाप शिर्षकमा संवाद गरेको छ ।
प्रदेश नं. १ सामाजिक विकास मन्त्री जीवन घिमिरेको प्रमुख आतिथ्यतामा सम्पन्न भर्चुअल संवादमा घिमेरे होम आईसोलेसनबाटै जोडिएका थिए ।घिमिरेले कोरोनाका सन्दर्भमा आफ्नो अनुभव सहित सबैलाई सचेत रहन जानकारी गराए । उनले आफ्नो बालयकालका बारेमा बताएका थिए । खोटाङ जिल्लाको हौचुर भन्ने ठाउँमा जन्म भएको जानकारी दिँदै घिमिरेले पढ्न जाँदा काठको पाटि बोकेर उकालो चढी विद्यालय जाने गरेको र माटोको डल्ला फुटाएर सिन्काले लेख्दै पढेको भन्दै आफ्नो बाल्यकाल सम्झिएका थिए ।
अतिथि वक्ताका रुपमा उपस्थित वरिष्ठ हास्य कलाकार मनोज गजुरेलले आफु बालयकालदेखि नै हास्ने र हसाँउने काम नै गरिरहेको बताएका थिए । उनले कक्षा १० सम्म पढ्दा ११ वटा स्कुलमा पढेको आफ्नो रोचक कुरापनि सुनाएका थिए । गजुरेलले आफुलाई आमाले पैसा नदिदाँ ५ दिनसम्म घर नआएको र घर आएपछि २ माना चामल बेचेको र पाएको पैसा साटी आफुले चारआना राखेर मैले पैसा माग्दा यहिबाट दिनु भनी आमालाई दिएको कथा पनि सुनाएका थिए ।
राजा राजेन्द्र र सुरक्षा पन्तले बाल्यकाल एकदम रोचक र सम्झनलायक हुन्छ भन्ने कुरामा जोड दिएका थिए । राजा राजेन्द्रले आफु सानामा अरुसँग कुरा गर्न नसक्ने साथै स्कुल जाँदा बाटोमा फलेको बोडि, सिबि भेटे सक्दिने गरेको भन्दै आफने बाल्काल स्मरण गरे । सुरक्षा पन्तले बाल्यकालमा आफुलाई धेरै कुराहरु जान्न सोध्न मन लाग्ने खालको भएको बताइन् । उनले सानोमा हजुरआमासँग बसेर हुर्केको बताउँदै हजुरआमासँग आफु धेरै निकट रहेको बताइन् ।
दमक नगरपालिकाका नगर प्रमुख रोमनाथ ओलीले आफ्नो बालयकालका बारेमा सुनाउँदा आफ्ना बासँग यो छाता कहाँ फल्छ भन्ने किसिमको प्रश्न गर्दा मधेसमा ठूलाठूला रुखमा खुर्सानी जसरी फल्छ भनेर सुनाउनु भएको र आफुले पत्याएको प्रसङ्ग सुनाएका थिए । नगर बाल सञ्जाल दमकले बाल दिवसको अवसर पारेर भाद्र २८ गते बालमैत्री संवाद शिर्षकमा छलफल कार्यक्रम सम्पन्न गरेको थियो ।
