२९ असार, एजेन्सी ।
टर्कीएको एउटा कोइलाखानीमा विस्फोट हुँदा २५ जनाको मृत्यु भएको छ । उत्तरी टर्कीएको बार्टिन प्रान्तमा रहेको कोइला खानीमा विस्फोट हुँदा कम्तीमा २५ जना मारिनुका साथै दर्जनौँ मानिसहरू पुरिएका छन् । ब्ल्याक सी तटमा मिथेन विष्फोटले चिरिएको सयौं मिटर कडा चट्टान मुनिबाट मृतकको शव निकालिएको उद्धारकर्ताहरूले शनिबार जानकारी दिएका छन् ।
विस्फोटका अन्य ११ घाइतेको अस्पतालमा उपचार गरिएको छ । उक्त विस्फोटलाई स्वास्थ्य मन्त्री फहरेटिन कोकाले अहिलेसम्मकै सबैभन्दा घातक औद्योगिक दुर्घटना बताएका छन् । ‘हामी वास्तवमै खेदजनक अवस्थाको सामना गरिरहेका छौँ’ आन्तरिक मन्त्री सुलेमान सोयलुले भने । विस्फोटको समयमा खानीमा करिब ११० जना मानिसहरू काम गरिरहेको बताइएको छ ।
जसमध्ये आधा भन्दा धेरै मानिसहरू खानीभित्र ३०० मिटरको गहिराइमा थिए । आपतकालिन उद्धारकर्ताहरूले थप मानिसहरूलाई जीवितै उद्धार गर्न सकिने आशामा चट्टान फोरेर खानीभित्र जाने प्रयास गरिरहेको बीबीसीले उल्लेख गरेको छ ।
उक्त खानीबाट उद्धारकर्मीहरूले विस्फोटका कारण पुरै कालोले ढाकिएका मानिसहरूलाई खानीबाट निकाल्दै गरेका भिडिओहरू सार्वजनिक भएका छन् । विस्फोटको कारण अझैसम्म थाहा हुन सकेको छैन र अधिकारीहरूले यसबारे अनुसन्धान सुरु गरेको जनाएका छन् । टर्कीका ऊर्जामन्त्रीले घटनाको प्रारम्भिक सङ्केतहरूबाट कोइला खानीमा निस्कने प्राकृतिक मिथेन ग्यासका कारण विस्फोट भएको हुनसक्ने देखिएको बताएका छन् ।
“हाम्रो लागि यो साँच्चिकै पश्चात्तापपूर्ण अवस्था हो,“ उनले भने । खानीको सुरुङ आंशिक रूपमा अवरुद्ध भएको तर हावाको आवतजावत गर्ने बाटो बन्द नभएको उनले जानकारी दिए । खानीभित्र आगो बाँकी नरहेको पनि उनले बताएका छन् । यो खानी टर्कीको सरकारी कम्पनी टर्कीस हार्ड कोल इन्टरप्राइजेजले सञ्चालन गरेको थियो ।
टर्कीका राष्ट्रपति रेजेप तय्यीप एर्दोआनले घटनास्थलको अवलोकन गर्ने तयारी गरिरहेका छन् । सन् २०१४ मा टर्कीको दक्षिणी सहर सोमामा भएको यस्तो कोइलाखानी विस्फोटमा ३०१ जना मारिएका थिए ।
