५ पुष , काठमाण्डौ।
त्रिभुवन विश्वविद्यालय (टीयु) क्रिकेट मैदानमा फ्लडलाइट र प्यारापिट निर्माणका लागि पुनः बोलपत्र आह्वान भएको छ । शहरी विकास मन्त्रालयअन्तर्गतको संघीय सचिवालय निर्माण तथा व्यवस्थापन कार्यालयले अन्तर्राष्ट्रिय स्तरको प्यारापिट र फ्लडलाइटका लागि शुक्रवार बोलपत्र आह्वान गरेको हो ।
प्यारापिटका लागि १ करोड ६२ लाख र फ्लडलाइटका लागि १ करोड ७३ लाख रुपैयाँ लागत छ । बोलपत्र पेश गर्न २०–१० हजार रुपैयाँ लाग्ने छ । बोलपत्र पेश गर्ने म्याद आगामी माघ ६ गते दिउँसो १२ः३० बजेसम्म छ ।
सोही दिन दिउँसो साढे १ बजे बोलपत्र खोलिने सूचनामा उल्लेख छ । यसअघि फ्लड लाइट जडानका लागि आह्वान गरिएका बोलपत्र पटक पटक रद्द भएका थिए । आर्थिक वर्ष २०७९÷८० को बजेटमा तत्कालीन अर्थमन्त्री जनार्दन शर्माले कीर्तिपुर मैदानको स्तरोन्नति र फ्लडलाइट जडानको प्रक्रिया अघि बढाउन २० करोड रुपैयाँ बजेट विनियोजन गरेका थिए ।
मैदान स्तरोन्नतिका लागि १० करोड र फ्लडलाइट जडानका लागि १० करोड छुट्याएकामा फ्लडलाइटको १० करोड खर्च नभई फिर्ता भएको थियो । आर्थिक वर्ष २०८१÷८२ को बजेटमा त्रिवि मैदानमा फ्लडलाइट जडानका लागि २० करोड रुपैयाँ विनियोजन भएको छ।
प्रधानमन्त्री केपी शर्मा ओली नेतृत्वको मन्त्रिपरिषद बैठकले गएको साउनमा त्रिवि क्रिकेट मैदानमा ३०० दिनभित्र फ्लडलाइट जडान र प्यारापिट निर्माण सक्ने निर्णय गरेको थियो । निर्णय भएको १५९ औं दिन बितिसकेको छ भने अब बाँकी मात्रै १४१ दिन रहेको छ ।
यो अवधिमा प्याराफिट निर्माण असंभव प्राय देखिएको छ । यद्यपि फ्लडलाइट जडानका लागि राष्ट्रिय खेलकुद परिषदले गरेको बोलपत्र भने पटक पटक रद्द हुँदै आएको छ । राखेपले ११ वैशाख २०८१ मपछिल्लो पटक बोलपत्र आह्वान गरेको थियो ।
राखेपको पूर्वाधार शाखामा आरसीपीएल– एसएमएस जेभी, सूर्योदय –बुद्धिराज जेभी, एमएसआईपीएल–एएससी पावर जेभी र वानी इन्फोटेक– कार्की बन्धु जेभीले राखेपमा निवेदन पेश गरेका थिए । तर सबै कम्पनी अयोग्य ठहरिएका थिए ।
पहिलो पटक ४ वैशाख २०८० मा राखेपले आह्वान गरेको बोलपत्रमा ५ वटा कम्पनीले निवेदन दिएका थिए । तर मूल्यांकन समितिले सबैलाई अयोग्य ठह¥याएको थियो । दोस्रो पटक साउन २०८० मा पनि बोलपत्र आह्वान गरियो ।
५ वटा कम्पनीले निवेदन दिएकामा २१ कात्तिक २०८० मा एमएसआइपीएल–एएससी पावर जेभी फ्लडलाइट निर्माणका लागि छनोट भयो । तर उक्त बोलपत्रमा छनोट नभएका ४ कम्पनीले पूर्वाग्रह राखेर कम्पनी छनोट गरिएको भन्दै पुस २०८० मा सार्वजनिक खरिद अनुगमन कार्यालयमा निवेदन दिएका थिए ।
त्यसपछि कार्यालयले पुनः मूल्याङ्कन गर्न निर्देशन दिएको थियो । सार्वजनिक खरिद अनुगमन कार्यालयको उक्त निर्देशनविरुद्ध टेण्डर पाएको कम्पनी एमएसआइपीएल–एएससी पावर जेभीले १९ पुस २०८० मा उच्च अदालतमा रिट दिएको थियो ।
१६ फागुन २०८० मा उच्च अदालतले टेण्डर रद्द गर्न आदेश दिएपछि दोस्रो पटकको टेण्डरबाट पनि कुनै कम्पनी छानिएनन् । १३ वैशाख २०८१ मा बोलपत्र आह्वान गरिएको डिजिटल स्कोर बोर्डको काम भने भइरहेको छ ।
डिजिटल स्कोर बोर्ड निर्माणको जिम्मा पञ्चकन्या÷हिमालयन जेभीले पाएको छ । मन्त्रिपरिषदले ३०० दिनभित्र फ्लडलाइट र प्यारापिट निर्माण गर्ने निर्णय गरे पनि यो चुनौतीपूर्ण छ । किनकी प्यारापिट निर्माणका लागि बजेटको बन्दोबस्त भएको छैन भने बल्ल बोलपत्र आह्वान गरिएको छ ।
मैदान स्तरोन्नति र फ्लडलाइट जडानका लागि आर्थिक वर्ष २०८१÷८२ को बजेटमा त्रिवि मैदानमा फ्लडलाइट जडानका लागि २० करोड रुपैयाँ विनियोजन भएको छ ।
