इलाम, माघ ४
अनसनरत डा. गोविन्द केसीलाई बिहीबार राती काठमाडौँ पठाईएको छ । चिकित्सा शिक्षा सुधारको माग राखी ९ दिनदेखि इलाममा अनशनरत केसीको स्वास्थ्य नाजुक भएपछि मध्यराति इलामबाट भद्रपुरसम्म एम्बुलेन्समा ल्याएर भद्रपुरबाट सेनाको नाइटभिजनले काठमाडौं पठाईएको हो ।।
१६औँ पटक इलाममा सत्याग्रह गरेका डा. केसीको स्वास्थ्य अवस्था कमजोर हुँदै गएपछि नागरिक समाजका अगुवाको पहलमा काठमाडौं लगिएको उनका सहयोगी धर्म गौतमले जनकारी दिए । धरानस्थित बीपी कोइराला स्वास्थ्य विज्ञान प्रतिष्ठानबाट खटिएको विशेषज्ञ चिकित्सकको टोलीले उनको स्वास्थ्यमा नौ प्रकारका समस्या औंल्याएको छ । डा. केसीलाई थप उपचारका लागि सुविधा सम्पन्न अस्पतालमा लैजान सुझाव आएको इलाम अस्पतालका मेडिकल अधिकृत डा. विजेन्द्रकुमार साहले जानकारी दिए ।
प्रतिष्ठानका सहनिर्देशक डा. विकास साह नेतृत्वको टोली केसीको उपचारमा बुधबार इलाम आइपुगेको थियो । स्वास्थ्य परीक्षणका क्रममा डा। केसीको शरीरमा अक्सिजनको मात्रा कम हुँदै ८० प्रतिशतमा झरेको, मुटुको चाल अनियन्त्रित भई घटेर ३५ र बढेर २०० सम्म पुग्ने गरेको, शरीरमा ग्लुकोजको मात्र कम हुँदै गएको छ ।
उनमा अनशनका कारण नियमित खाँदै आएको मुटुको औषधि खान छुटेको, शरीरमा हानिकारक रसायन बढ्दै गएको लगायतका समस्या देखिएको छ ।
