१२ वैशाख, काठमाण्डौ ।
तनहुँ क्षेत्र नम्बर–१ बाट भारी मतान्तरसहित राष्ट्रिय स्वतन्त्र पार्टी (रास्वपा)का उमेदवार डा. स्वर्णिम वाग्ले निर्वाचित भएपछि उनीसँगै चुनावीप्रतिस्पर्धामा रहेका अन्य उम्मेदवारहरुको जमानत सफत भएको छ । वाग्ले नेपाली कांग्रेस छोडेर चुनाव लड्नकै लागि मनोनयन दर्ताको केही दिनअघि मात्र रास्वपामा प्रवेश गरेका थिए ।
डा. वाग्लेले कांग्रेस, नेकपा (माओवादी केन्द्र), नेकपा (एकीकृत समाजवादी) र जनता समाजवादी पार्टी (जसपा)का साझा उमेदवार कांग्रेसका गोविन्द भट्टराईलाई झन्डै १५ हजार मतान्तरले हराए । वाग्ले ३४ हजार ९१९ मतसहित निर्वाचित भए । उनका निकटतम प्रतिस्पर्धी भट्टराईले २० हजार १२२ मत ल्याए ।
नेकपा (एमाले)का उम्मेदवार सर्वेन्द्र खनाल आठ हजार ४८८ मतमा सीमित भए । पूर्वआईजीपी खनालले गएको मंसिर ४ गते भएको प्रतिनिधिसभा सदस्य निर्वाचनमा काठमाडौं–६ बाट प्रतिस्पर्धा गरेका थिए । त्यहाँ पराजित भएका उनी उपनिर्वाचन लड्न तनहुँ पुगेका हुन् ।
उनीहरूबाहेक अरू सबै उमेदवारको जमानत जफत भएको छ । तनहुँ–१ मा कुल ६४ हजार १८९ मत सदर भएको छ । जमानत (धरौटी) जोगाउनका लागि त्यसको १० प्रतिशत मत ल्याउनुपर्ने हुन्छ । कुल सदरको १० प्रतिशत पु¥याउन ६ हजार ४१८ मत ल्याउनुपर्ने देखिन्छ ।
प्रतिनिधिसभा सदस्य निर्वाचन ऐन, २०७४ को दफा ७१ मा जमानत जफतसम्बन्धी व्यवस्था छ । “पहिलो हुने निर्वाचित हुने निर्वाचन प्रणालीअन्तर्गतको कुनै निर्वाचनमा मतदान गरिएको जम्मा सदर मतको दश प्रतिशतभन्दा कम सदर मत पाउने उमेदवारको धरौटी जफत हुनेछ,” ऐनको दफा ७१ मा लेखिएको छ, “तर, निर्वाचित उमेदवारको हकमा यो कुरा लागु हुने छैन ।”
एमालेका उमेदवार खनालले त्योभन्दा करिब दुई हजार मत बढी ल्याएर जमानत जोगाएका छन् । नौमध्ये बाँकी ६ उम्मेदवारको जमानत जफत भएको छ । तनहुँ–१ मा राष्ट्रिय प्रजातन्त्र पार्टी (राप्रपा)की उमेदवार शोभा गुरुङले २१८ मत ल्याएकी छन् । मंगोल नेशनल अर्गनाइजेसनका उमेदवार प्रेमबहादुर थापाले १६६ मत पाएका छन् ।
त्यसबाहेकका दलका उमेदवारको त १०० मत पनि नआएको निर्वाचन आयोगले जनाएको छ । नागरिक उन्मुक्ति पार्टीका भीमबहादुर सुनारले ९९ मत पाएका छन् । राष्ट्रिय जनमुक्ति पार्टीका पूर्णबहादुर रानाले ८७ मत ल्याएका छन् । तनहुँ–१ मा नेपाल मजदुर किसान पार्टीका रामप्रसाद प्रजापतिले ३१ मत पाउँदा नेपाल कम्युनिष्ट पार्टी (समाजवादी)का उमेदवार गणेश श्रेष्ठले ५९ मत ल्याएका छन् ।