२८ असोज, एजेन्सी ।
टापु राष्ट्र ताइवान क्षेत्रमा फेरि तनाव बढेको छ । चीनले फेरि ताइवानलाई घेरा हालेर आफ्नो सैन्य अभ्यास सुरु गरेको छ । ताइवानका राष्ट्रपतिले आफ्नो सरकारले चिनियाँ नियन्त्रण स्वीकार नगर्ने कडा भाषण दिएलगत्तै चीनले ताइवानको तटमा आजबाट नयाँ सैन्य अभ्यास सुरू गरेको हो ।
यसले सो क्षेत्रमा तनाव बढाएको छ । ताइवानका राष्ट्रपति विलियम लाइले गत साता चीनको नियन्त्रण नस्वीकार्ने भाषण गरेका थिए । बेइजिङले ’स्वर्ड–२०२४ बी’ दिएको यो अभ्यासमा युद्धपोत र लडाकु विमानहरूले भाग लिइरहेका छन् । उक्त अभ्यास टापु वरपर नौ स्थानहरूमा भइरहेको छ ।
ग्लोबल टाइम्सकाअनुसार सोमबार, पीपुल्स लिबरेसन आर्मी (पीएलए) पूर्वी थिएटर कमाण्डले ताइवान स्ट्रेट र उत्तर, दक्षिणका क्षेत्रहरूमा सेना, नौसेना, वायुसेना र रकेट फोर्सका आफ्ना सेनाहरू पठाइरहेको उल्लेख छ ।
’यस अभ्यासले पृथकतावादी कार्यहरूका लागि कडा चेतावनीको रूपमा काम गर्दछ,’ पीएलए पूर्वी थिएटर कमाण्डका प्रवक्ता वरिष्ठ क्याप्टेन ली सीले सोमबार बिहान जारी गरेको विज्ञप्तिमा छ। पृथकतावादी कार्यहरूलाई कडा चेतावन दिन र राज्यको सार्वभौमसत्ता र राष्ट्रिय एकताको रक्षाका लागि यो वैध र आवश्यक कार्य भएको प्रवक्ताले बताएको ग्लोबल टाइम्सले लेखेको छ।
ताइवानले २५ विमान, सात नौसैनिक जहाज र चार अन्य जहाज अभ्यासमा रहेको पाएको बताएको छ । चीनको पिपुल्स लिबरेसन आर्मी (पीएलए) ले ताइवान टापु वरपर ९ स्थानमा युद्धाभ्यास भइरहेको जनाएको छ । यसमा ताइवानमाथि आक्रमणको अभ्यास भइरहेको छ ।
चीनको तटीय गार्डले पनि टापुको वरिपरि निरीक्षण गर्न जहाजहरूको फ्लीट पठाएको छ। चिनियाँ सेनाले ताइवान वरपरका नौ क्षेत्रहरू देखाइएको नक्सा प्रकाशित गरेको छ जहाँ अभ्यास हुनेछ। यसले टापुको पूर्वी तटमा दुई साइटहरू, पश्चिम तटमा तीन, उत्तरमा एउटा र चिनियाँ तटको छेउमा ताइवान–नियन्त्रित टापुहरू वरपर तीन साइटहरू चिन्ह लगाएको छ।
ताइवानको रक्षा मन्त्रालयले चिनियाँ अभ्यासको कडा निन्दा गर्दै यसलाई ’अतार्किक र उत्तेजक कार्य’ भनेको छ। सेना पठाइएको पनि उसले जानकारी दिएको छ । चीनले यसअघि पनि ताइवानको वरिपरि ठूलो युद्ध अभ्यास गरेको थियो ।
चीनले उक्त टापु आफ्नो दाबी गर्दै आएको छ । चीनले ताइवान वरिपरिको सैन्य अभ्यासलाई स्वशासित टापुको लागि ’स्वतन्त्रता’ खोज्नेहरू विरुद्ध ’कडा चेतावनी’ भनेको छ । चीनले ताइवानलाई छुट्टिएको प्रान्तको रूपमा हेर्छ, तर टापु आफैंलाई छुट्टै ठान्छ र यसको आफ्नै सरकार र सेना छ ।
गत मे २०मा पनि लाइकोले भाषण गरेलगत्तै, पीएलए पूर्वी थिएटर कमाण्डले ताइवान स्ट्रेट, ताइवान टापुको उत्तर, दक्षिण र पूर्व, साथै किनमेन, मात्सु, टापुहरू वरपरका क्षेत्रहरूमा संयुक्त अभ्यासहरू आयोजना गरेको थियो ।
यसैबीच यता पूर्वी चीनको शानडोङ प्रान्तको एक बायोटेक कम्पनीमा विषाक्त ग्यास चुहावट हुँदा सातजनाको मृत्यु भएको छ । चारजना घाइते भएका छन् । ग्यास शनिबार दिउँसो १ः३० बजेबाटै चुहावट भएको शौगुआङ शहरको आपतकालीन व्यवस्थापन ब्यूरोले जनाएको छ ।
घाइतेहरुको अवस्था सामान्य रहेको ब्यूरोले जनाएको छ । साथै, दुर्घटनाको कारण पत्ता लगाउन अनुसन्धान भइरहेको छ ।
