२२ भदौ , काठमाण्डौ ।
हास्यब्यङको प्रस्तुतिकै कारण थुनामा रहेका स्ट्यान्ड अप कमेडियन अपूर्व क्षितिज सिंहलाई पक्राउ गरेकोमा नेकपा (एमाले)ले विरोध जनाएको छ । एमालेले आज प्रतिनिधिसभामा क्षितिजलाई पक्राउ गरेर सरकारले कलाकारमाथि अत्याचार र दमन गरेको बताएको छ ।
एमालेका प्रमुख सचेतक विशाल भट्टराईले पार्टीको तर्फबाट प्रतिनिधिसभाको बुधबारको बैठकमा समय माग गरेर बोल्दै स्ट्यान्ड अप कमेटियन अपूर्व क्षितिज सिंहलाई पक्राउ गरिएकोमा विरोध गरेको हो । स्ट्यान्ड कमेडीका क्रममा अपूर्वले नेवार समुदायमाथि व्यङ्ग्य गरेका थिए । जसको विरोध गर्दै अभियन्ताहरुले प्रहरीले उजुरी दिएपछि उनी पक्राउ परेका थिए ।
’एक जना हास्य कलाकार अपूर्व क्षितिज सिंहजीले केही दिन अगाडि आफ्नो पोष्टमा हास्यव्यङ्ग्य पोष्ट गरेवापत उहाँ १० दिनदेखि थुनामा हुनुहुन्छ । हुनत मन्त्रीलाई यसो कर्के नजर लगायो भने गार्डहरु थुनामा पर्ने देश हो । अहिले त्यो खालको मन्त्रीजीहरु सत्तामा आसिन हुनुहुन्छ । अब भनौं भने के भनौं,’ उनले भने,
’मन्त्रीजीलाई अलिकति आलोचना ग¥यो भने पनि पक्राउ परेर जाने स्थिति छ । तर उहाँले कला प्रस्तुत गर्ने क्रममा अलिकति हाँस्य प्रस्तुतिको क्रममा केहीलाई मर्का प¥योहोला । कसै न कसैलाई मर्का पार्ने प्रस्तुती नै हुन्छ हाँस्यकलाहरुमा । म ती हाँस्य कलाकार सिंहलाई शीघ्र रिहाईको माग गर्न चाहन्छु,’ उनले भने ।
राजनीतिक दलका नेताहरूले प्रज्ञाभवन र सभागृहमा बसेर हास्य कलाकारहरूको आफूमाथिको कडा व्यंग हाँसेरै स्वीकार गरेको उल्लेख गर्दै भट्टराईले भने, ’अपूर्व क्षितिज सिंहजस्तो एउटा कलाकारलाई दशौं दिनदेखि थुनामा राख्ने क्रिया यो सरकार गरिरहेको छ । अपूर्वले आफ्नो प्रस्तुति सामाजिक संजालबाट डिलिट गरेको र क्षमा मागेको अवस्थामा अत्याचार गर्नबाट सरकार पछि हट्नुपर्ने भट्टराईको भनाइ छ ।
’यसभन्दा अगाडि नै आफ्नो पोष्टबाट डिलिट मात्रै गर्नुभएको छैन, क्षमा याचना पनि गरिसक्नुभएको छ । उहाँलाई थुनेर कुनै पनि खालको अत्याचार नगरियोस् र कलाकारमाथि दमन गरियोस्,’ उनले भने । अपूर्वलाई प्रहरीले भदौ १२ गते पक्राउ गरेको थियो । उनले युट्युब च्यानल कमेडी क्याफेमा राखेको भिडियोमा नेवार समुदायको कला, संस्कृति र लवजमाथि व्यंग्य गरेको भन्दै उजुरी परेपछि प्रहरीले उनलाई पक्राउ गरेको थियो । अपूर्वलाई थुनामा राखिएको भन्दै कमेडी च्याम्पियनका विजेता बनिसकेका कलाकार हिमेश पन्तले पनि उनको रिहाईको माग गरेका थिए । यस प्रकरणमा सामाजिक सञ्जालको समर्थन र सहानुभूति अपूर्वप्रति देखिएको छ । अपूर्वले भिडिओ हटाएर गल्ती स्वीकार्दै माफी मागिसकेपछि उनलाई हिरासतमा पु¥याउनु अनुदार व्यवहार भएको टिप्पणी धेरैले गरेका छन् । यद्यपि कतिपयले कमेडीका नाममा एउटा जातमाथि खनिनु आपत्तिजनक भन्दै यसको समाधान कानूनी प्रक्रियाबाटै हुनुपर्ने तर्क पनि गरिरहेका छन् ।
