Nepal Times
Nepal Times
3
Shares

दुबईमा ४१ नेपाली जेल सजाय भोग्दै, जेलमा रहेकाको अवस्थाबारे अध्ययन गर्दै दूतावास

दुबईमा ४१ नेपाली जेल सजाय भोग्दै, जेलमा रहेकाको अवस्थाबारे अध्ययन गर्दै दूतावास

४ माघ, काठमाडौं । संयुक्त अरब इमिरेट्स (यूएई)को दुबईमा ४१ जना नेपालीले जेल जीवन बिताइरहेका छन् ।

त्यहाँका जेलमा रहेका नेपालीको अवस्थाबारे अध्ययन गर्न सुरु गरेको नेपाली दूतावास आबुधाबीका अनुसार जेलमा ३७ पुरुषसहित चार जना महिला रहेका छन् भने चार जना सजाय पूरा गरी नेपाल फर्किएका छन् ।

दूतावासको टोली जेल पुगेको केही दिनमै एक महिलालाई नेपाल फिर्ता पठाइएको छ । बाँकी १ जना महिलासहित २ पुरुष गरी ४ जनाले जेल सजाय पूरा गरी नेपाल फर्किएको दूतावासले जनाएको छ । दुबई जेलमा रहेका नेपालीलाई दूतावासका प्रतिनिधिले भेटसमेत गरेका छन् ।

दुबईको जेलमा रहेका नेपालीको अवस्था बुझ्न यूएईका लागि नेपाली राजदूत कृष्णप्रसाद ढकालसहित श्रम काउन्सेलर निर्मला थापा, स्थानीय जनसम्पर्क अधिकृत (पीआरओ) इरफान आलम दुबईको अल अविरमा रहेको सेन्ट्रल जेलमा पुगेका हुन् ।

दूतावासको टोलीले जेलमा रहेका नेपालीको अवस्था, आवश्यक कानुनी सहयोग तथा कागजी प्रक्रियाबारे सहजीकरण गरेको थियो । अघिल्ला वर्षहरुमा जस्तै वर्षमा दुई पटक जेल भ्रमण गर्ने योजना भए पनि सन् २०२० मा कोरोनाका कारण दूतावासले जेल भ्रमण गर्न सकेको थिएन ।

तर यस वर्ष भने सातैवटा इमीरेट्स पुगेर त्यहाँका ८ वटा कारागारमा कैदी जीवन बिताइ रहेका नेपालीको मुद्दा, उनीहरुमाथि लागेको आरोप र अवस्थाबारे जानकारी लिने दूतावासले जनाएको छ ।

त्यस्तै उनीहरुलाई लागेको आरोप वा मुद्दाका विषयमा दूतावासले गर्न सक्ने कानूनी सहजीकरण, कानूनी सजाय पूरा गरेर नेपाल फर्किनेलाई हवाई टिकटको व्यवस्था गर्ने योजना अनुरुप अभियान सुरु गरेको यूएईका लागि नेपाली राजदूत कृष्णप्रसाद ढकालले जानकारी दिए । धेरैजसो नेपाली जेल पर्नुको मुख्य कारण जाँडरक्सी देखिएको छ ।

यसअघिको तथ्याँक अनुसार अनियन्त्रित रुपमा जाँड रक्सी पिउने र झै–झगडा गर्ने तथा झगडाले उग्र रुप लिंदा हत्यासमेत भएका घटना यूएईमा भएका छन् । त्यस्ता काममा संलग्न केही अहिले पनि दुबईको जेलमा छन ।

त्यस्तै कतिपयले सामाजिक मूल्य र मान्यता विपरीत यूएईमा अबैध यौन क्रियाकलाप, सार्वजनिक स्थलमा जथाभावी गतिविधि तथा अवैध सम्बन्ध गांसेर गर्भधारणा गर्ने जस्ता कारणले नेपालीहरु जेल परेका हुन् । त्यस्तै केही नेपाली लागूऔषध ओसारपोसारमासमेत संलग्न भएकाले जेल परेका हुन् ।

यूएईका जेलमा लागू औषध ओसारपोसार तथा कारोबारमा संलग्न रहेका कारण आजीवन काराबासको सजायसमेत सुनाइएकोले त्यसतर्फ सचेत रहन दूतावासले भनेको छ ।

त्यस्तै सामाजिक सञ्जालको दुरुपयोग, अवैधानिक विप्रेषण (हुन्डी), ट्रफिक नियमको पालना, यूएईमा निषेध गरिएका वस्तुहरुको ओसारपसार जस्ता कार्यहरुमा सचेत रहन दूतावासले अनुरोधसमेत गरेको छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.