१९ जेठ, काठमाडौं ।
कृषि तथा पशुपन्छी विकासमन्त्री पद्माकुमारी अर्यालले अबको दुई वर्षभित्र दूधमा आत्मनिर्भर हुने बताइन ।
आगामी आर्थिक वर्ष २०७८÷७९ को बजेटमा समेत दूधमा दुई वर्षभित्र आत्मनिर्भर हुने उल्लेख भएको हुनाले सोहीअनुसार कार्यक्रम बनाएर लक्ष्य पूरा गर्ने उनले बताएकी हुन् ।
२१औँ विश्व दूध दिवसको अवसरमा राष्ट्रिय दुग्ध विकास बोर्डले मङ्गलबार आयोजना गरेको अभौतिक कार्यक्रममा मन्त्री अर्यालले प्रतिव्यक्ति ११ लिटर दूध अपुग रहेको र त्यसलाई दुई वर्षभित्र पूरा गर्ने दाबी गरीन् ।
दुग्ध र डेरी क्षेत्रलाई प्रोत्साहित गर्नेगरी बजेट ल्याएको बताउँदै उनले दुग्ध क्षेत्रमा भएका तमाम समस्या समाधानतर्फ मन्त्रालय लागिरहेको भन्दै उनले दूध उत्पादन बढाउने र बजारीकरण गर्ने कार्यतर्फ मन्त्रालय लागिपरेको बताइन् ।
कोभिड–१९ महामारीले दुग्ध क्षेत्रमा समस्या सिर्जना गरेको भन्दै उनले यस विषयमा मन्त्रिपरिषद्को बैठकमा समेत छलफल भएको र बजारसँग जोडिएका कुरालाई सहजीकरण गर्ने दिशातर्फ सरकार अगाडि बढेको बताइन् ।
मन्त्री अर्यालले सरकारले दूध नीति अगाडि बढाएको भन्दै अहिलेको असहज परिस्थतिलाई विशेष अवस्थाको रूपमा बुझेर धैर्य गर्नसमेत किसानलाई आग्रह गरीन् ।
बोर्डका अध्यक्ष राजेन्द्र यादवको अध्यक्षतामा भएको कार्यक्रममा कृषि मन्त्रालयका कृषितर्फबाट सचिव डा. योगेन्द्र कार्की, पशुपन्छीतर्फका निमित्त सचिव डा. विमल निर्मललगायत दूध क्षेत्रका विभिन्न सरोकारवालाको उपस्थिति थियो ।