१ मंसिर, काठमाण्डौ।
नेपाली काँग्रेसका सभापति एवं पूर्वप्रधानमन्त्री शेरबहादुर देउवा, उनकी पत्नी पूर्वमन्त्री आरजु राणा देउवा, पूर्वप्रधानमन्त्री पुष्पकमल दाहाल प्रचण्ड र काँग्रेस नेता एवं पूर्वमन्त्री दीपक खड्काविरुद्ध अनुशन्धान गर्ने बाटो खुलेको छ ।
उनीहरुमाथि सम्पत्ति शुद्धीकरणमा मुद्या चल्न सक्छ । सम्पत्ति शुद्धीकरण अनुसन्धान विभागले देउवा, प्रचण्ड र दीपक खड्काको जलेको घरको खरानीमा नेपाली र विदेशी मुद्राको अवशेष रहेको फरेन्सिक रिपोर्ट प्राप्त गरेको छ ।
जेनजी आन्दोदलनका क्रममा जलाइएका ती घरको खरानी सम्पत्ति शुद्धीकरण विभाग र नेपाल प्रहरीको केन्द्रीय अनुसन्धान ब्युरोको टोलीले संकलन गरी जाँच गर्न नेपाल प्रहरीको प्रयोगशालामा पठाएको थियो ।
त्यसको रिपोर्ट केही दिनअघि प्राप्त भए पनि विभागले सार्वजनिक गरेको छैन । विभाग र ब्युरोको टोलीले देउवा, प्रचण्ड, खड्कासहित तत्कालीन प्रधानमन्त्री एवं एमाले अध्यक्ष केपी शर्मा ओलीको जलेको घरमा पुगेर खरानी संकलनसहित मुचुल्का उठाएको थियो ।
‘देउवा, दाहाल र खड्काको घरमा देखिएको, भेटिएका नोट र खरानीको फरेन्सिक जाँच गरिएको थियो । त्यसको रिपोर्ट आएपछि प्रधानमन्त्री सुशीला कार्की, अर्थमन्त्री रामेश्वर खनाललाई समेत बिफ्रिङ गरिएको विभागका अधिकारीले बताएका छन् ।
यो रिपोर्टपछि विभागलाई सम्पत्ति शुद्धीकरणमा देउवा, उनीक पत्नी आरजु देउवा, दाहाल र खड्कामाथि अनुसन्धान गर्ने बाटो खुलेको छ । भदौ २४ गते जेनजी आन्दोलनका क्रममा प्रदर्शनकारीले देउवा, दाहाल र खड्काको घरमा आगो लगाएपछि पैसाको थुप्रो जलेको भन्दै भिडियो सार्वजनिक गरिएका थिए ।
खड्काको घरबाट त प्रदर्शनकारीले पैसाका बिटा फालेको भिडियोसमेत सार्वजनिक गरेका थिए । त्यसपछि विभाग र ब्युरोले मुचुल्का उठाएर अनुसन्धानका लागि खरानीसहित जलेका अवशेष संकलन गरेका थिए ।
बुढानीलकण्ठस्थित देउवाको घरमा डलर र नेपाली रुपैयाँ (हजार÷पाँच सयका नोट) का जलेका टुक्राहरू भेटिएको विभागको दाबी छ । केही व्यक्तिहरुले देउवाको घरमा पैसा राख्ने सुरुङसमेत भेटिएको दाबी गरे पनि त्यसको पुष्टि भएको छैन ।
देउवाका स्वकीय सचिव भानु देउवाले विज्ञप्ति जारी गरेर घरमा पैसा राख्ने सुरुङ नभएको दाबी गरेका थिए । देउवा पार्टीको केन्द्रिय समितिमा आएर उक्त भिडियो फेक भएको, एआईले बनाएको दाबी गरेका थिए ।
यता प्रचण्डका निवासमा पनि पैसा राख्न प्रयोग गरिने सेफहरू फोडिएको भिडियोहरु सार्वजनिक भएका थिए । विभागका एक अधिकृतका अनुसार देउवा, दाहाल र खड्काको घरमा पुगेर मुचुल्का गर्दा डढेका नोट भेटिएका थिए ।
ओलीको घरमा भने पुस्तकहरु मात्रै जलेको भनिएको थियो। विभागले ओलीको घरको अवशेषबारे केही बताएको छैन । देउवा, आरजु र खड्कामाथि सम्पत्ति शुद्धीकरणको अनुसन्धान जारी छ । विभागले हालसम्म संकलित प्रमाण हेर्ने कामलाई तीव्र पारेको छ ।
असोज ५ गते विभागको टोलीले देउवा र खड्कानिवास अवलोकन गरी क्षति र सम्पत्तिको मुचुल्का उठाएको थियो। उनीहरुको घरमा पैसा जलेकाले कारबाहीको माग उठेपछि विभागले अनुसन्धानका लागि टोली खटाएको हो।
विभागले सामाजिक सञ्जालमा आएका फोटा, भिडियो लगायतलाई पनि फरेन्सिक परीक्षणका लागि पठाएको थियो । प्रधानमन्त्री सुशीला कार्कीले असोज ९ गते राष्ट्रका नाममा सम्बोधन गर्दै जेनजी प्रदर्शनका क्रममा व्यक्तिका निजी घर तोडफोड र आगजनी हुँदा अस्वाभाविक रूपमा देखिएको नगद रकमका सम्बन्धमा सरकारका सम्बद्ध निकायले छानबिनको कारबाही सुरु गरिसकेको बताएकी थिइन् ।
यसैबीच नेपाली कम्युनिष्ट पार्टीका संयोजक समेत रहेका प्रचण्ड स्वयंले नै आफूजस्ता नेताका घरमा एकदुई करोड पैसा हुनु स्वभाविक भएको र आफूले घरमा भन्दा पनि छोरी र साथीभाइका घरमा पैसा राख्ने गरेको खुलासा गरेका छन् ।
साथै उनले जेनजी आन्दोलनमा आगजनी भएको आफ्नो घरबाट एक लाख नगद मात्रै भेटिएको दावी गरेका छन् । आफूले घरमा खासै पैसा राख्ने नगरेको उनको भनाइ छ ।
हिमालयन टेलिभिजनको यक्ष प्रश्नमा अन्तरवार्ता दिँदै प्रचण्डले आफूले सुरक्षाका खातिर १०–५ लाख रुपैयाँ गरेर साथीभाइको घरमा राख्न दिने गरेको खुलासा समेत गरेका छन् ।
यस्तै दुई ट्रक पैसा त अघिल्लो रात नै अन्तै लैजानुभयो भनेर एकजना पूर्वप्रहरी अधिकारीले भन्नुभएको छ नि भन्ने प्रस्तोताको प्रश्नमा उनले हाँस्दै भने, त्यसको खण्डनमा पनि सचिवालयबाट विज्ञप्ति आइसकेको छ ।
सावित गर भनेर चुनौति दिइएको छ । त्यो १०० प्रतिशत झूटो थियो । सबै हेर्दा कहीँ न कहीँ निकै ठूलो षडयन्त्र छ जस्तो लाग्छ नेपालका पार्टी र नेताहरुविरुद्ध । प्रहरीको पूर्वअफिसरले यति ठूलो प्रचार गर्ने र सेन्सेसन फैलाउने काम गरे ।
म राति १० बजेसम्म खुमलटारमा मिटिङमा छु । सबै नेताहरु त्यहाँ जम्मा छन् । ११ बजे बेडमा गएको छु । आरामसँग सुतेको छु । केको ट्रकमा लाने ? हावा कुरा ।त्यसपछि प्रस्तोताले पुनः यति ठूलो पार्टी सञ्चालन गरिरहनुभएको छ, देशैभरि संगठन छ, कार्यकर्ताको व्यवस्थापन गर्नुपर्छ । घरमा कहिले बिरामीको उपचार गर्नुपर्छ।
कार्यकर्ताको भिड लागेको हुन्छ । चन्दा पनि बैंकिङ च्यानलबाट त्यति धेरै आउँदैन । पार्टीको कोष सञ्चालनमा अध्यक्ष नै पावरफुल हुनुहुन्छ । त्यसैले शीर्ष नेताको घरमा एकाध करोड हुनु ठूलो त होइन नि ?
भनेर सोधेपछि प्रचण्डले आश्चर्यजनक स्वीकारोक्तिसहित भने, त्यो ठूलो कुरा होइन (एकाध करोड) हुन सक्छ । तर मैले घरमा पैसा राख्दैनथेँ । साथीहरुकैमा राखिदिन्थेँ । अलिअलि गरेर, बरु १० लाख, ५ लाख, ४ लाख गरेर विभिन्न ठाउँमा राख्दा सुरक्षित पनि हुन्छ र सजिलो पनि हुन्छ भनेर ।
फेरि पार्टीभित्र के हो भनेर प्रश्न पनि उठ्दैन । विभिन्न ठाउँमा राखेको छ थाहा छ साथीहरुलाई पनि । यस विषयमा आफुले र छोरी गंगा दाहालले पनि अनुशन्धानका लागि राज्यलाई सक्ने सहयोग गरिराखेको उनले बताए ।
यसअघि नै जेनजी आन्दोलनमा भएका सत्यतथ्य छानविन गर्न गठित आयोगले पनि फौजदारी अभियोगमा आयोगको प्रतिवेदन पर्खिन नपर्ने भन्दै प्रहरीलाई आन्दोलनसंग जोडिएका घटनामा आएका उजुरीका आधारमा कानून प्रक्रिया चलाउन सुझाएको थियो ।
जेनजी आन्दोलनका केही शहिदका परिवार र घाइतेहरुले सो दिन राज्यका तर्फबाट व्यापक दमन गरिएको भन्दै तत्कालिन प्रधानमन्त्री केपी ओली र गृहमन्त्री रमेश लेखकलाई पक्राउ गरेर कारबाही गर्न माग गर्दै प्रहरीमा जाहेरी दिएका छन्, तर त्यहाँबाट प्रक्रिया अगाडि बढेको छैन ।
