७ फागुन , काठमाण्डौ ।
पूर्वप्रधानमन्त्री एवं कांग्रेस सभापति शेरबहादुर देउवा भारत भ्रमणमा जाने भएका छन् । लामो समयदेखि प्रयास गर्दा समेत प्रधानमन्त्री केपी शर्मा ओलीलाई भ्रमणका लागि भारतले निमन्त्रणा नपठाएको अवस्थामा प्रमुख सत्तारुढ दल नेपाली कांग्रेसका सभापति तथा पूर्वप्रधानमन्त्री देउवा भने भोलि भारत जान लागेका हुन् ।
भारतको प्रयागराजमा चलिरहेको महाकुम्भका अवसर पारेर उनी भारत भ्रमणमा जान लागेका हुन् । देउवाका स्वकीय सचिव भानु देउवाले भारत भ्रमण हुन लागेको बताएका छन् । इन्डिया फाउन्डेसनको आयोजनामा हुन लागेको ‘कुम्भ ग्लोबल समिट अन डेभलपमेन्ट एन्ड सस्टेइनबेलीटी’ कार्यक्रमको वक्ताको रुपमा देउवा भारत जान लागेका हुन् ।
शुक्रबार र शनिबार हुने कार्यक्रममा देउवाले समिटलाई सम्बोधन गर्नेछन् । देउवा सहभागी हुने यो कार्यक्रममा उत्तर प्रदेशका मुख्यमन्त्री योगी आदित्यनाथ पनि सहभागी हुनेछन् । यस्तै कार्यक्रममा भुटानका विदेशमन्त्री, गुयानकी फस्ट लेडी, मलेसियाका मन्त्री, मौरिसका मन्त्रीलगायतका विदेशी पाहुना पनि सहभागी हुनेछन् ।
कुम्भ मेलामा आयोजित कार्यक्रमबाहेक देउवाको थप कार्यक्रम पनि तय भएको बताइएको छ । ४५ दिन चलेर १४ फागुनमा कुम्भ मेला सकिँदैछ । यसअघि कांग्रेस महामन्त्री गगन थापा, प्रवक्ता प्रकाश शरण महत, नेता अर्जुननरसिंह केसी लगायत पनि कुम्भ मेलामा सहभागी भई गंगामा स्नान गरेर फर्किएका थिए ।
यसअघि कार्तिकमा एसिया जलवायु शिखर सम्मेलनमा सहभागी हुन गगन थापा दिल्ली पुगेका थिए । त्यसअघि भदौमा परराष्ट्रमन्त्री डा.आरजु राणा देउवा भारतको औपचारिक भ्रमणका क्रममा नयाँ दिल्ली पुगेकी थिइन्, जतिबेला उनको शिष्टाचार भेट भारतीय प्रधानमन्त्री नरेन्द्र मोदीसँग पनि भएको थियो ।
पछि पुसमा पनि उनी नेपाल समसामयिक अध्ययन केन्द्र र भारतको फाउन्डेसन फर इकोनोमिक ग्रोथ एन्ड वेलफेयर (एग्रो) को आयोजनामा भएको एक सम्मेलनलाई सम्बोधन गर्न भारत पुगेकी पुगेकी थिइन् ।
यसबीच उनको भेट भारतीय विदेशमन्त्री एस जयशंकरसंग पटक पटक भइसकेको छ । तीन दिन अघि मात्रै पनि ओमानमा दुई मन्त्रीबीच साइडलाइन वार्ता भएको थियो । आरजुको भारत भ्रमणलाई ओलीका लागि भ्रमणको बाटो फुकाउने टुल्सका रुपमा हेरिएपनि अहिलेसम्म मोदीले प्रधानमन्त्री केपी शर्मा ओलीलाई बोलाएका छैनन् ।
उनीहरुबीच अमेरिकामा भने साइडलाइन वार्ता भएको थियो । तेस्रो कार्यकालमा कुर्सी सम्हालेसंगै आफ्ना अध्यक्षले छिटै नै भारत भ्रमण गर्ने एमालेका नेताहरुले दाबी गरिरहँदा तथा ओली स्वयंले पनि आफ्नो पहिलो विदेश भ्रमण भारतबाट होस् भन्ने इच्छा राख्दासमेत अहिलेसम्म भारतले ग्रिन सिग्नल दिएको छैन ।
यसबीच ओलीले अमेरिकादेखि चीनसम्मको भ्रमण भने गरिसकेका छन् । तर भारत जान अझै उनलाई जुरेको छैन । पछिल्लो समय कांग्रेसकै नेता तथा ऊर्जा, जलस्रोत तथा सिञ्चाईमन्त्री दीपक खड्का पनि भारत भ्रमणमा पुगेका थिए ।
‘इन्डिया इनर्जी विक–२०२५’ मा भाग लिन माघ २८ गते भारत गएका थिए । उनले पनि आफ्नो भ्रमणका क्रममा अब भारतीय उर्जामन्त्री नेपाल आउने त्यसबेला उनले ओलीलाई निम्ता दिन सक्ने कुरा भएको बताएका छन् ।
उनले भारतीय उर्जामन्त्रीको नेपाल भ्रमणपछि प्रधानमन्त्री भारत भ्रमणमा जाने दाबी गरेका छन् । तर यसअघि आरजु जाँदा र उनीअघि जयशंकर आउँदा पनि यस्तै चर्चा गरिएको थियो, यद्यपि ओलीले अहिलेसम्म निम्ता पाएका छैनन् ।
यसबीच अब कांग्रेसका नेता र मन्त्रीहरुको ओहोरदोहोर चलिरहँदा सभापति स्वयं पनि भारत जान लागेका हुन् ।
