धरान, माघ १६
धरान उपमहानगरपालिकाले नेपालकै उत्कृष्ट सडकहरू बनाउने अभियानअन्तर्गत अहिले फूलबारीसहितका सडकहरू बनाउने कार्यलाई तीव्रता दिएको छ ।
स्थानिय तहको निर्वाचनपछि धरान उपमहानगरपालिकाले सडक निर्माणको नयाँ नीतिअनुसार फुलबारी सहितको अपाङ्गमैत्री सडक निर्माण बनाउन लागेको हो । धरान–१६ स्थित जनपथको ९ सय ८० मिटर लामो सडक को निर्माण कार्य सुरु भएको छ ।
१ करोड ३९ लाख २७ हजार १ सय ६७ रुपैयाँ मा निर्माण हुन लागेको सडकहरूमा फुलबारीसहित साइकल कुद्ने र अपाङ हिंड्ने छुट्टै सडक बन्नेछन् ।
दुवैतिर ड्रेन र फुलबारीसहितको सडकको चौडाई ५० फिट रहने उपमहानगरले जनाएको छ । पहिलो चरणमा धरान १६ स्थित विद्युत प्राधिकरण मार्गमा नमुना सडक बनाएको छ भने दोस्रो चरणमा धरान–१६ स्थित जनपथ र रेडक्रसबाट विजयपुर जाने बाटोलाई नमुना सडकको रूपमा निर्माण गर्न ठेक्का दिइसकेको छ ।