१५ पौष, एजेन्सी ।
राम्रो आम्दानी, कम खर्च, सेवासुविधा लगायत विभिन्न प्रलोभनमा पारी सोझासाझा मानिसहरुको फाइदा उठाएर उनीहरुलाई ठगी, लाखौँ कुम्ल्याएर विभिन्न देशमा लगेर अलपत्र पार्ने, अवैद्य कारोबार र कामहरुमा लगाउने, विभिन्न देश लगेर कामदारहरुलाई बेच्नेजस्ता घटना घटेका समाचारहरु दिनहूँ आउने गर्दछन् ।
परिवार पाल्न त्यस्ता प्रलोभनमा परी हजारौँ नेपाली युवाहरु विदेशमा अलपत्र परेका छन् भने कति लाखौँ रकम नक्कली म्यानपावर वा एजेन्टहरुबाट ठगिएका छन् । त्यस्तै लाखौँ रकम ठगिएको मात्र नभएर नक्कली भिसा बनाइ विदेशसम्म पुगेको र विदेश पुगेपछि मात्रै आफ्नो भिसा नक्कली रहेको र आफू ठगिएको चाल पाएको एउटा घटना बाहिर आएको छ ।
लाखौँ रुपैयाँ आम्दानी हुने प्रलोभनमा फस्दा एक व्यक्तिको लाखौँ पैसा मात्रै नभएर विदेश पुगेर अनेकौँ समस्या र झमेला झेल्नुपरेको छ । ती व्यक्तिले ११ लाख रुपैयाँ ठगी मात्रै भएन विभिन्न देश पुगेर अनावश्यक झमेला बेहोर्न बाध्य भए ।
ठगीका गिरोहले उनलाई नेपालबाट भारत, कतार र रुससम्म पु¥याएर बेचबिखन गर्न लागेका अवस्थामा नक्कली भिसामा विदेश पठाएर बेचबिखन गर्न लागेको पाइएको छ । नेपालबाट रुसको विमानस्थल पुगेपछि त्यहाँको प्रहरीले भिसा नक्कली भएको पत्ता लगाएको थियो ।
उनलाई झुक्याएर श्रमशोषणका लागि युक्रेनमा बेचबिखन गर्न लागेको पाइएपछि नेपाल फिर्ता गरेको नेपाल प्रहरीको मानव बेचबिखन अनुसन्धान ब्युरोका प्रहरी उपरीक्षक दानबहादुर मल्लले जानकारी दिएका छन् । उनका अनुसार यसरी नक्कली भिसा बनाएर मानिस विदेशमा बेचबिखन गर्ने काममा दाङको लमहीका ४७ वर्षीय दिनेशकुमार चौधरी र सिन्धुपाल्चोकका २३ वर्षीय रुपेश ढकाल मुछिएका छन् ।
उनीहरू अहिले पुर्पक्षका लागि कारागार चलानसमेत भएका छन् । उनीहरूले सुरुमा पीडितलाई चेक रिपब्लिकमा सीप गार्डको काम लगाइदिने र मासिक दुई लाख रुपैयाँ पारिश्रमिक पाउने लोभ देखाएर वैदेशिक रोजगारीमा जान प्रेरित गरेका थिए । उनीहरूले पटक–पटक गरी पीडितसँग ११ लाख ५० हजार रुपैयाँ ठगी गरी दुई वर्षसम्म झुलाएका थिए ।
सुरुमा उनले भारतको नयाँ दिल्लीबाट पठाउने भनी भारत पु¥याए । तर लामो समयसम्म विदेश जाने कुनै प्रक्रिया नै नगरि अलपत्र राखेपछि उनी आफन्तको सहयोगमा नेपाल फर्किएका थिए । त्यसपछि पैसा फिर्ता माग्न जाँदा नदिएर पोर्चुगल पठाइदिने प्रलोभन देखाएपछि पीडित फेरि विदेश जान पाइने आशमा लोभिएर अर्काै प्रक्रिया सुरु गरेको पाइएको प्रहरी उपरीक्षक मल्लले बताए ।
त्यसपछि उनले भ्रमण भिसामा त्रिभुवन अन्तर्राष्ट्रिय विमानस्थलबाट कतारको दोहा हुँदै रुस पठाइदिए । रुसको प्रहरीले नक्कली भिसामा आएको र युक्रेनमा श्रम शोषणका लागि बेच्न लागिएको भन्दै पीडितलाई विमानस्थलबाटै पक्राउ गरी नेपाल डिपोर्ट गरिदिएको पीडितको भनाइ उद्धृत गर्दै ब्युरोले जनाएको छ ।
उनी नेपाल डिपोर्ट हुँदा यस्ता अन्य नागरिक रुसको विमानस्थलमा अलपत्र परेको देखेको पीडितले बताएको ब्युरोले जनाएको छ । नेपाल आएर पीडितले चौधरी र ढकालविरुद्ध मानव बेचबिखन गरेको आरोपमा कात्तिक २२ गते जाहेरी दिएका थिए । त्यही जहेरीका आधारमा चौधरीलाई मङ्सिर १५ गते र ढकाललाई १६ गते पक्राउ गरी प्रहरीले पुस ६ गतेसम्म अनुसन्धान गरेको थियो ।
