२७ मंसिर , काठमाण्डौ ।
नेपाल कम्युनिस्ट पार्टी ९एमाले० को ११ औँ राष्ट्रिय महाधिवेशन आजबाट सुरु हुँदै छ । महाधिवेशनको उद्घाटन भक्तपुरको सल्लाघारीस्थित खुल्ला चौरमा पार्टी अध्यक्ष केपी शर्मा ओलीले गर्दै छन् । उद्घाटन सत्रमा देशभरबाट करिब तीन लाख नेता तथा कार्यकर्ता सहभागी हुने एमालेले जनाएको छ ।
उद्घाटन समारोहमा नेपालको एकताको प्रतीकका रूपमा २०० भन्दा बढी कला, संस्कृति झल्काउने झाँकी प्रदर्शन गरिने तयारी गरिएको छ । आज हुने उद्घाटन समारोहमा नेपाली काँग्रेसका सभापति शेरबहादुर देउवा, नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ लगायतका विभिन्न १६ वटा पार्टीको अध्यक्ष एवं प्रतिनिधिलाई निमन्त्रणा गरिएको एमालेले जनाएको छ ।
महाधिवेशनमा भ्रातृत्व, मैत्रीपूर्ण कूटनीतिक सम्बन्ध रहेका विभिन्न देशका विदेशी कूटनीतिक नियोग एवं विभिन्न पार्टीका प्रतिनिधिको शुभकामना सन्देश प्राप्त भइरहेको आयोजकले नजाएको छ ।
महाधिवेशन शान्तिपूर्ण भयरहित वातावरणमा सम्पन्न गर्न एमालेको २४ वटा जनसङ्गठनको प्रतिनिधित्व रहने गरी ५०० बढी स्वयंसेवक ‘ड्रेस कोड’मा खटिने एमाले प्रचार विभाग प्रमुख राजेन्द्र गौतमले जानकारी दिएका छन् ।
जनसेवालाई व्यवस्थित र शान्तिपूर्ण बनाउन १० हजार तालिम प्राप्त स्वयंसेवक परिचालन गरिएको छ । टाढासम्म रहेका सहभागीले वक्ताले बोलेको प्रस्ट देखिने गरी मञ्चको दायाँबायाँ ३० फिट अग्ला दुई वटा ‘एलइडी स्क्रिन’ राखिएका छन् ।
तीन किलोमिटर परसम्म सुन्न सकिने ११५ वटा उच्च गुणस्तरका ‘साउन्ड सिस्टम’ जडान गरिएको र मञ्च अगाडि देशभरबाट आएका नेता, मन्त्री, सांसद एवं विभिन्न कूटनीतिक नियोगका प्रतिनिधिका लागि २५ हजार कुर्सी कार्यक्रम स्थलमा राखिएको छ ।
हाधिवेशन उद्घाटनमा मञ्चमा बनाइएको चाँगुनारायण मन्दिरको छेउमा विद्युतीय पाला राखिने र त्यही पालालाई रिमोटद्वारा बालेर पार्टी अध्यक्ष केपी शर्मा ओलीले महाधिवेशन उद्घाटन गर्ने तयारी गरिएको छ ।
पार्टीको ११औँ महाधिवेशन भएकाले पार्टीका ११ वटा झन्डा राखिने, १० वटा झन्डा सुरुमै फहराइने, एउटा झन्डा रिमोटबाट फहराउने तयारी गरिएको छ । यसै बिच एघारौँ राष्ट्रिय महाधिवेशन सुरु हुनुअघि नेकपा एमालेको अन्तिम सचिवालय बैठक शुक्रवार साँझ अबेरसम्म चलेको बैठकले मूख्यगरी तीन वटा निर्णय गरेको छ ।
बैठकले पार्टी विधान संशोधन नगर्ने, सचिवालयकै नेताहरूबाट बन्द सत्र सञ्चालन गर्ने र १०८ जना प्रतिनिधि मनोनीत गर्ने निर्णय भएको छ । जेनजी आन्दोलनपछि एमालेको पार्टी संरचनामा युवा देखाउनुपर्ने दबाब भएकाले पनि ओली सहितका नेताहरू पदाधिकारी बढाउन चाहन्थे ।
तर सहमति नजुट्दा प्रस्ताव असफल भयो । एमाले बैठकमा ओलीले राखेको प्रस्ताव असफल भएको यो सम्भवतः पहिलो निर्णय हो । प्रतिनिधि थप गर्ने विषयमा ओली र पोखरेल पक्ष बिच सहमति हुन नसकेको हो ।
‘दुवै पक्षबाट नामहरू राख्ने काम भयो, प्रस्तावित नाममै गएर छलफल गर्दा बैठक लामो चल्यो,’ एक पदाधिकारी भन्छन्, ‘साँझ अबेर हुँदा पनि सहमति नजुट्दा अध्यक्ष र वरिष्ठ उपाध्यक्षले टुङ्ग्याउने भनेर उठ्यौ ।’
उनका अनुसार प्रस्तावित नामहरूलाई ओली र पोखरेलले टुङ्ग्याउनेछन् । प्रचार प्रमुख गौतम, सहमतिमै भोलि मनोनीतहरूको नामावली तय हुने बताएका छन् । एमालेमा मनोनीत प्रतिनिधि बन्न चाहनेहरूको पनि ठुलो सङ्ख्यामा छन् ।
नेतााहरुका अनुसार पाँच सय बढीले प्रतिनिधि मनोनीत हुन चाहेका छन् । यही मनोनीत कोटामा निम्ति गुन्डु पुग्ने नेताहरूको ठुलो सङ्ख्या देखिएको थियो । बैठकले गरेको अर्को निर्णय हो, छुट्टै अध्यक्ष मण्डल नबनाउने ।
उपमहासचिव ज्ञवालीका अनुसार १८ जना पदाधिकारी रहने सचिवालयले नै अध्यक्ष मण्डलको काम गर्नेछन् । बाँकी निर्णय भने वरिष्ठ उपाध्यक्ष पोखरेलले ल्याएको प्रस्तावमाथि भएको छ ।
अध्यक्ष पदका प्रत्याशी पोखरेलले आफूले सार्वजनिक गरेको अवधारणा दस्ताबेजलाई हलमै छलफल गरिनुपर्ने प्रस्ताव राखेका थिए । तर पोखरेलको प्रस्तावमा सहमति जुटेन । प्रतिनिधिहरूले पाउने झोलामै अवधारणा पत्र राखेर छलफलमा लैजानुपर्छ भन्ने माग उनले राखेका थिए ।
महाधिवेशन प्रतिनिधिहरूलाई पोखरेलको दस्ताबेज बाँड्ने प्रबन्ध मिलाउने सहमति भएको छ । प्रतिनिधिलाई बाँड्ने मात्र नभएर पोखरेलले बन्द सत्र हलमा आफ्नो अवधारणा प्रस्तुत गर्ने पनि सहमति जुटेको छ ।
एघारौँ महाधिवेशनबाट मनोनीत १०८ जना सहित २,२६२ प्रतिनिधिले नयाँ नेतृत्व चयन गर्नेछन् । नेतृत्वका लागि अध्यक्ष, ३ उपाध्यक्ष, महासचिव, ३ उपमहासचिव र ७ सचिवका लागि प्रतिस्पर्धा हुनेछ । अध्यक्षका लागि केपी शर्मा ओली र ईश्वर पोखरेलको समूह चुनावी मैदानमा छ ।
