९ असार, एजेन्सी ।
आईसीसी विश्वकप छनोट अन्तर्गत समूह चरणको अन्तिम तथा निर्णायक खेलमा नेपालले नेदरल्यान्ड्सलाई १६८ रनको सामान्य लक्ष्य दिएको छ । टस हारेर ब्याटिङ थालेको नेपालले उत्कृष्ट प्रदर्शन गर्न सकेन ।
सुपर सिक्स पुग्न जित्नैपर्ने खेलमा नेपालले ४४.३ ओभरमा अल आउट हुँदै १६७ रनको योगफल तयार पा¥यो । नेपालका कप्तान रोहित पौडेलले ५५ बलमा ३ चौका र १ छक्कासहित सर्वाधिक ३३ रनको योगदान दिए । अन्तिम विकेटको रुपमा आउट भएका सन्दीपले ३३ बलमा ४ चौकासहित २७ रन बनाए ।
अन्य कुनैपनि ब्याटरले राम्रो प्रदर्शन गर्न सकेनन् । कुशल भुर्तेलले २७, भिम सार्कीले २२ रन बनाउँदा कुशल मल्ल १२ रनमा आउट भए । थप दोहोरो स्कोरका रुपमा दीपेन्द्र सिंह ऐरीको १४ रन बनाउँदा गुल्सन झा १५ रनमा आउट भए ।
नेदरल्यान्ड्सका लागि लोगन भान बेकले ४ विकेट लिँदा विक्रम जित सिंह र बास दि लिडले समान २–२ विकेट लिए। त्यस्तै, क्लेटन फ्लोइड र अर्यान दतले समान १–१ विकेट लिएका थिए । आजको खेलमा नेपाललाई ‘सुपर सिक्स’मा पुग्नका लागि जितबाहेकको विकल्प छैन । नेपाल पराजित भएमा नेदरल्यान्ड छनोट हुनेछ ।
