२४ साउन, विराटनगर ।
नेपाल टाइम्स मिडिया प्रा.लि. तेस्रो वर्ष पूरा गरी चौथो वर्षमा प्रवेश गरेको छ । २०७४ साउन २४ गते स्थापना भई प्रदेश १ को राजधानी विराटनगरमा रहेर समाचार सामग्री प्रकाशन र प्रसारण गर्दै आएको नेपाल टाइम्सले शनिबार विराटनगर स्थित केन्द्रिय कार्यालयमा एक कार्यक्रमको आयोजना गरी वार्षिकोत्सव मनाएको छ ।

 

 

कोरोना महामारीका कारण स्वास्थ्य सावधानी अपनाई सामाजिक दुरी कायम गर्दै समिति कर्मचारीका माझ आयोजना गरिएको वार्षिकोत्सव कार्यक्रममा सञ्चालक तथा कर्मचारीहरुको उपस्थिती रहेको थियो ।

कार्यक्रममा देशमा भएका दर्जनौ मिडियाहरुमाझ नेपाल टाइम्सले छोटो समयमा नै दर्शक र पाठक सामु लोकप्रिय बन्दै छुट्टै पहिचान बनाएको भन्दै नेपाल टाइम्स मिडिया प्रा.लि.का निर्देशक मुकुल दाहालले खुशी ब्यक्त गरे ।

 

कार्यक्रममा नेपाल टाइम्स मिडिया प्रा.लि.का सिईओ सहैन्शा सिद्धिकीले नेपाल टाइम्सले समाजमा ब्यवसायिक रुपमा अनलाइन पोर्टललाई हेर्ने दृष्टिकोमा परिर्वतन ल्याउन ठूलो भूमिका खेलेको भन्दै अन्य अनलाइन पोर्टलहरुका लागि पनि यो खुशीको विषय भएको बताए ।

वार्षिकोत्सव कार्यक्रममा कर्मचारीहरु मध्येबाट उत्कृष्ट कार्यसम्पादनका आधारमा कार्यक्रम प्रस्तोता रस्मिता उदासलाई विशेष सम्मान गरिएको थियो ।

 

स्थापनाकालमा आफ्नो अनलाईन पोर्टलwww.nepaltimes.net मार्फत सामाजिक, आर्थिक, राजनितिक, अन्तर्राष्ट्रिय, मनोरञ्जनात्मक लगायत थुप्रै विधामा सत्यतथ्य र निष्पक्ष समाचारहरु पाठक समक्ष पुर्याउँदै आएको नेपाल टाईम्सले २०७४ भदौ १७ गतेदेखि प्रदेश १ कै पहिलो अनलाईन टेलिभिजन समेत सञ्चालनमा ल्याएको थियो ।

अनलाइन टेलिभिजनमार्फत सञ्चालित कार्यक्रमले छोटो समयमा नै दर्शकको मन जित्न सफल भएका छन । चोथौ वर्षको पूर्व सन्ध्यामा नेपाल टाइम्सले सामाजिक संजाल यूट्युबबाट सिल्भर प्लेट हासिल गरिसकेको छ ।