विराटनगर, साउन २९
नेत्रविक्रम चन्द विप्लव नेतृत्वको नेपाल कम्युनिष्ट पार्टीले आफ्ना प्रवक्ता तथा स्थायीसमिति सदस्य खड्गबहादुर विश्वकर्मा पक्राउको विरोधमा आज गरेको नेपाल बन्दका कारण जनजीवन प्रभावित भएको छ ।
बन्दका कारण विराटनगरमा पनि छिटपुट मात्रामा मात्रै सवारी साधन सञ्चालनमा आएका छन् भने बजार पसल पनि खुलेको मोरङ प्रहरीले जनाएको छ । संभावित दुर्घटनालाई रोक्न र बन्दमा अराजक गतिविधी हुन नदिन सुरक्षा व्यवस्था कडा बनाईएको प्रहरीले जनाएको छ ।
बन्दको कारण प्रदेश नं. १ का पहाडि तेह्रथुमलगायतका जिल्ला भने बढी प्रभावित भएका छन् । लामो तथा छोटो दुरीका सवारी साधन चल्न नसक्दा यात्रुहरुलाई सास्ती भएको छ । उता प्रहरीले झापामा आज विप्लवका पाँच जना कार्यकर्तालाई पक्राउ गरेको छ ।
बन्दमा शान्ति सुरक्षालाई मध्यनजर गर्दै उनीहरुलाई पक्राउ गरिएको झापाका प्रहरी नायव उपरीक्षक जितेन्द्रकुमार बस्नेतले जानकारी दिनुभयो । प्रहरीले उनीहरुको साथबाट चन्दा रसिद र पर्चा, दस्तावेज समेत बरामद गरेको छ ।
बन्दको प्रभाव उत्तरी मोरङमा पनि परेको छ । यातायत मात्र वन्द भएपछि विद्यालयहरु पनि आफसेआफ वन्द भएका छन । सुरक्षाको कारण देखाउँदै प्याव्सन बेलबारीले सल्लाह नै गरेर निजि विद्यालयहरु बन्द गरेको छ ।
उच्च मावि र क्याम्पसहरुका विहानी कक्षाहरु भने निर्वाध रुपमा संचालन भएका छन । वन्दका कारण पूर्व पश्चिम राजमार्गमा पर्ने, सधैँ व्यस्त देखिने बेलबारी तथा विराटचोक बजारमा यातायातका साधन चलेका छैनन । कडा सुरक्षा व्यवस्थाका बीच छोटा दुरीका म्याजिक र माइक्रो भने सचालन भएका छन । ईलाका प्रहरी कार्यालय बेलबारीका प्रमुख रामकुमार राईले सुरक्षा व्यवस्था कडा पारिएकोले सर्वसाधारणले आतंकित हुनु नपर्ने वताउनु भएको छ ।
यसैबीच चन्दा असुली लगायतको आरोपमा पक्राउ परेका प्रवक्ता विश्वकर्मालाई ४८ घण्टाभित्र उपस्थित गराउन सर्वोच्च अदालतले सरकारलाई आदेश दिएको छ ।
विश्वकर्मासहित तीनजनालाई प्रहरीले गत मंगलबार काठमाडौंबाट पक्राउ गरेको थियो । विश्वकर्मालाई सात करोड भन्दा बढी रकम चन्दा संकलन गरेको आरोप सरकार पक्षले लगाएको छ ।
