विराटनगर, पुस ९
नोबेल मेडिकल कलेजमा पारामेडिकलका नयाँ विद्यार्थीलाई स्वागत र अध्ययन पुरा गर्ने विद्यार्थीलाई बिदाई गरिएको छ । सीटीईभीटीको पारामेडिकल कार्यक्रम अन्र्तगत डिप्लोमा ईन फार्मेसी, ल्याव टेक्निसियन, डेन्टल हाईजिनिस्ट र रेडियोग्राफीमा भर्ना भएका नयाँ विद्यार्थीलाई स्वागत र सोहि संकायमा अध्ययन पुरा गरेका विद्यार्थीलाई एकैसाथ विदाई गरिएको हो ।
पारामेडिकल कार्यक्रमको दोस्रो र तेस्रो वर्षमा अध्ययनरत विद्यार्थीहरुले कार्यक्रम गरेका हुन् । सो अवसरमा नोबेल शिक्षण अस्पतालका प्रबन्ध निर्देशक इन्दिरा शर्मा, प्राचार्य डा.रामहरी घिमिरे, शैक्षिक कार्यक्रम संयोजक डिल्लीराम निरौला, आर्थिक विभाग प्रमुख अमिर न्यौपाने लगायतले विद्यार्थीहरुलाई खादा लगाएर स्वागत र अविरसहित मायाको चिनो दिएर विदाई गरे ।
कार्यक्रमलाई संबोधन गर्दै नोबेलका प्रबन्ध निर्देशक इन्दिरा शर्माले विदाई भएका विद्यार्थीहरुलाई उज्ज्वल भविष्यको शुभकामना ब्यक्त गरी नयाँ आएका विद्यार्थीहरुलाई राम्रो मेहनत गरेर अध्ययन गर्न सुझाव दिईन् । त्यस्तै कलेजका प्राचार्य डा.रामहरी घिमिरे र जनसम्पर्क अधिकृत नारायण दाहालले नयाँ विद्यार्थीलाई अनुशासित भएर कलेजको नियम कार्यान्वयन गर्न आग्रह गर्दै विदाई भएका विद्यार्थीहरुलाई नोबेलको नाम उच्च राख्नेगरी काम गर्न आग्रह गरे ।
नोबेलमा एम्डी, एमएस, एमवीवीएस, वीडीएस, वीएस्सी नर्सिङ, वीएनएस, स्टाफ नर्स, ल्याव टेक्निसियन, रेडियोग्राफी, डेन्टल हाईजिनिस्ट, डिफार्म लगायत संकायमा करिव १ हजार ६ सय विद्यार्थी अध्ययनरत छन् । नेपालका बिभिन्न जिल्लासँगै भारत, माल्दिभ्स लगायत देशबाट पनि विद्यार्थीहरु अध्ययनका लागि आउँने गरेको नोबेल मेडिकल कलेजले जनाएको छ ।
