१४ असार, एजेन्सी ।
बुधबार दुर्घटनामा परेको टाइटानिक पनडुब्बीको भग्नावशेष क्यानडाको तटमा फेला परेको छ । हालै यो पनडुब्बी उत्तरी एट्लान्टिकमा डुबेको थियो । पनडुब्बीको भग्नावशेष भेटिएको ठाउँमा केही मानव अवशेष पनि भेटिएको बताइएको छ । अमेरिकी कोस्ट गार्डले जारी गरेको एक विज्ञप्तिमा भनिएको छ कि अमेरिकी चिकित्सा पेशेवरहरूले यी अवशेषहरूको अध्ययन गर्नेछन्।
सन् १९१२ मा डुबेको टाइटानिक जहाजको भग्नावशेष हेर्न गएका पाँच जना यस पनडुब्बीमा सवार थिए । पनडुब्बी भग्नावशेषबाट करिब १६०० फिट टाढा रहेको बेला दुर्घटनामा परेको थियो । पनडुब्बीमा विष्फोट भएको र केही सेकेण्डमै ध्वस्त भएको बताइएको छ ।
पनडुब्बीमा बेलायती एडभेन्चर हमिस हार्डिङ, बाबु–छोरा जोडी प्रिन्स र सुलेमान दाउद, ओसेनगेट एक्सपिडिसनका सीईओ स्टकटन रश र फ्रान्सेली नागरिक पल–हेनरी नार्गियोलेट सवार थिए। पनडुब्बी जुन १८ मा यात्रामा निस्किएको थियो र केही समयपछि नै सम्पर्कविहीन भएको थियो ।
जुन २८ मा यसको भग्नावशेषका ठूला टुक्राहरू क्यानाडाको सेन्ट जोन्स, न्यूफाउन्डल्याण्ड तटबाट पानीबाट बाहिर निकालिएको थियो । अमेरिकी कोस्ट गार्डद्वारा जारी विज्ञप्तिमा भनिएको छ, ’टाइटन पनडुब्बीको भग्नावशेष स्थलमा एम÷भी होराइजन एट्लान्टिक सेन्ट जोन्स न्युफाउन्डल्याण्डमा केही भग्नावशेष र प्रमाण फेला परेको छ।
अन्तर्राष्ट्रिय साझेदार अनुसन्धान एजेन्सीहरूसँग परामर्श गरेपछि, समुद्री अनुसन्धान बोर्ड (एमबीआई) ले प्रमाणहरू अमेरिका लैजाने निर्णय गरेको छ। यहाँ यसको विश्लेषण र परीक्षण पूरा हुनेछ। कोस्ट गार्डले भग्नावशेषलाई सावधानीपूर्वक चिकित्सा विज्ञहरूसम्म पु¥याउने बताएको छ।
अर्कोतर्फ, एमबीआईका प्रमुख क्याप्टेन न्युबाउरले दूरी र गहिराइमा भेटिएका यी महत्त्वपूर्ण प्रमाणहरू संरक्षण गर्न अन्तर्राष्ट्रिय र अन्तर–एजेन्सी सहयोगको लागि आभार ब्यक्त गरेका छन् । पेलजिक रिसर्च सर्भिसको रिमोट अपरेटिङ भेहिकलले भग्नावशेष भएको ठाउँ पत्ता लगाएको थियो । एजेन्सीले आफ्नो टोली अझै मिशनमा रहेको बताएको छ।
अमेरिकी कोस्ट गार्डले पनि पनडुब्बी कसरी विस्फोट भयो भनेर अनुसन्धान गर्नेछ। यसैबीच एक पनडुब्बी विशेषज्ञले टाइटानिक पनडुब्बीबाट केही सुरागहरू पत्ता लगाएका छन् जसले पनडुब्बी कसरी विष्फोट भयो भनेर देखाउँदछ।
डाक्टर जास्पर ग्राहम–जोन्सले द सनलाई भनेका छन् कि पाँच जनाको ज्यान लिएको विनाशकारी असफलताको पछाडि धेरै कारकहरू हुन सक्छन्। उनले परीक्षण नगरिएको कमजोर झ्याल, इलिक्टिक सर्टसक्रिट , बाहिरी दबाब र चालकको असावधानी लगायतका कारणहरु उल्लेख गरेका छन् ।
