४ कार्तिक, एजेन्सी ।
सुपरस्टार फुटबलर तथा कप्तान लिओनल मेसीको ह्याट्रिकसँगै इन्टर मियामीले मेजर लिग सकरमा सानदार जित हासिल गरेको छ । अमेरिकन लिग सकरअन्तर्गत इन्टर मियामीले न्यु इंग्ल्यान्डमाथि फराकिलो जित निकालेको छ ।
आइतबार बिहान आफ्नो ३४औं खेल खेलेको मियामीले घरेलु मैदानमा न्यु इंग्ल्यान्डमाथि ६–२ गोलान्तरको जित निकालेको हो । अर्जेन्टिनी फरवार्ड लियोनल मेसीको ह्याट्रिक गोलको सहायतामा मियामीले ऐतिहासिक जित निकालेको हो ।
यो जितसँगै डेभिड बेकह्यामको क्लब मियामीले एमएलएसमा एकै सिजन सबैभन्दा बढी अंक बनाएको हो । यसअघि सन् २०२१ मा मियामीले ७३ अंक जोडेको थियो, तर यसपालि भने मेसीआबद्ध मियामी ७४ अंक बनाउन सफल भएको छ ।
न्यु इंग्ल्यान्डलाई हराउन मियामीको जितमा कप्तान मेसीले ह्याट्रिक गोल गरे । सन् २०२१ मा फ्रेन्च क्लब पिएसजी छोडेर अमेरिका आएका मेसीले मियामीको जर्सीमा भने पहिलो ह्याट्रिक गरेका हुन् ।
खेलको ५७औं मिनेटमा बेन्चबाट मैदान प्रवेश गरेका मेसीले १० मिनेटभित्रै ह्याट्रिक पूरा गरे । उनले खेलको ७९, ८१ र ८९ औं मिनेटमा लगातार गोल गरेका थिए । ३७ वर्षीय मेसीले पाँच दिनभित्र राष्ट्र र क्लबका लागि ह्याट्रिक गोल गरे ।
यसअघि विश्वकपको दक्षिण अमेरिकी छनोटमा बोलिभियाविरुद्ध उनले ह्याट्रिक गोल गरेका थिए । उक्त खेलमा अर्जेन्टिनाले बोलिभियालाई ६–० गोलान्तरले हराएको थियो । यससँगै मेसी तीन फरक टिमबाट सबैभन्दा धेरै गोल गर्ने एकमात्र खेलाडी बने ।
मेसीले स्पेनिस क्लब बार्सिलोनाका लागि ६७२ गोल गरेका छन् भने अर्जेन्टिनाबाट ११२ गोल गरेका छन् । यसैगरी मेसीले इन्टर मियामीका लागि भने ३३ गोल गरेका छन् । यो सिजन एमएलएसमा मेसीले २० गोल गरेका छन् ।
मेसीले राष्ट्र र क्लबका लागि जम्मा ८४९ गोल गरेका छन् । विश्व फुटबलको सर्वाधिक गोलकर्ता क्रिस्टियानो रोनाल्डोभन्दा मात्र ५८ गोलले पछाडि छन् मेसी । पोर्चुगलका कप्तान रोनाल्डोले एक हजार २४५ खेलमा ९०७ गोल गरेका छन् ।
मेसीले एक हजार ७८ खेलमा नै ८४९ गोल गरेका हुन् । ह्याट्रिकतर्फ पनि मेसी रोनाल्डोनजिक छन् । ३९ वर्षीय रोनाल्डोले हालसम्म क्लब र राष्ट्रका लागि जम्मा ६६ वटा ह्याट्रिक गरेका छन् । पाँच पटकका बालोन डी‘ओर विजेता रोनाल्डोका प्रतिद्वन्द्वी मानिने मेसीले ५९ ह्याट्रिक गोल गरेका छन् ।
सर्वाधिक आठ पटकका बालोन डी‘ओर विजेता मेसीले निकट भविष्यमै रोनाल्डोलाई गोल र ह्याट्रिकमा भेट्टाउने सम्भावना छ । न्यु इंग्ल्यान्डसँगको खेलमा मेसीले ह्याट्रिक गोल गर्दा लुइस स्वारेजले दुई तथा बेन्जामिन क्रेमास्कीले एक गोल गरे ।
न्यु इंग्ल्यान्डका लुका लांगोनी र डिलेन बोरेरोले एक–एक गोल गरे ।खेलको दोस्रो मिनेटमा लांगोनी र ३४औं मिनेटमा बोरेरोले गोल गरेपछि पाहुना टोलीले अग्रता बनाएको थियो । खेलको ४०औं र ४३औं मिनेटमा स्वारेजले गोल गरेपछि मियामी बराबरीमा फर्कियो ।
५८औं मिनेटमा बेन्जामिनले गोल गरेर मियामीलाई अग्रता दिलाएका थिए । मेसीले भने १० मिनेटको अवधिमै तीन गोल गरेका थिए । यससँगै शीर्ष स्थानको मियामीले ३४ खेलमा ७४ अंक बनायो । उसले दोस्रो स्थानमा रहेको कोलम्बसलाई १२ अंकले पछि पा¥यो ।
एमएलएसको जारी संस्करणको उपाधि भने मियामीले उचालिसकेको छ । सँगसँगै मियामी २१औं संस्करणको फिफा क्लब विश्वकपमा पनि छनोट भएको छ । यसैबीच फिफाका अध्यक्ष जियानी इन्फान्टिनोले इन्टर मियामीले पनि क्लब विश्वकप खेल्ने जानकारी दिएका छन् ।
मेसी समर्थक यो निर्णायको लामो समयदेखि प्रतिक्षा गरिरहेका थिए । मेसीको अपार लोकप्रियताका कारण दक्षिण फ्लोरिडामा केही खेलहरू आयोजना गर्ने पहिले नै तय गरिएको थियो । हरेक चार वर्षमा आयोजना हुने प्रतियोगितामा फिफाका ६ वटा फुटबल कन्फेडेरेसनका ३२ टोलीको सहभागिता रहनेछ ।
सन् २०२५ को जुन १५ मा मियामी गार्डेन्सस्थित हार्ड रक स्टेडियममा हुने प्रतियोगिताको पहिलो खेलमा इन्टर मियामीले प्रतिस्पर्धा गर्नेछ । ’विश्वको उत्कृष्ट क्लबमध्ये एकको रूमा मियामी फिफा क्लब विश्वकप २०२५ मा अमेरिकाको प्रतिनिधित्व गर्न योग्य छ,’ इन्फान्टिनोले भनेका छन् ।
यो प्रतियोगिता जुलाई १३ सम्म चल्नेछ र फाइनल न्यूजर्सीको मेटलाइफ स्टेडियममा हुनेछ, जुन २०२६ को विश्वकप फाइनलको स्थल पनि हो ।
