२४ जेठ, एजेन्सी ।
टी–२० विश्वकपमा आज पाकिस्तान र अमेरिका आमनेसामने हुँदैछन् । पाकिस्तानले विश्वकपको सुरुआत आज आयोजक राष्ट्र अमेरिकाविरुद्धको खेलसँगै गर्दैछ । खेल अमेरिकाको डालासस्थित ग्रान्ड प्रेरी रङ्गशालामा नेपाली समय अनुसार, राति ९ः१५ बजे सुरु हुनेछ । सन् २०२१ को संस्करणमा पाकिस्तान सेमिफाइनलमा रोकिएको थियो । त्यसको पनि एक वर्षपछिको संस्करणमा फाइनलमा पराजित भयो । अब भने उसले उपाधिको आशा राखेको छ ।
पाकिस्तान र अमेरिका प्रतियोगिताको समूह ‘ए’ मा छन् । उक्त समूहमा भारत, क्यानडा र आयरल्यान्ड पनि रहेका छन् । पाकिस्तानबाहेक सबै टोलीले आफ्नो एक–एक खेल खेलिसकेका छन् । उक्त समूहको पहिलो खेलमा अमेरिकाले छिमेकी राष्ट्र क्यानडालाई सात विकेटले हराएको थियो । अर्को खेलमा भारतले आयरल्यान्डलाई आठ विकेटले पराजित गरेको थियो । त्यसैले आज रातिको खेलमा पाकिस्तान पहिलो जितको खोजीमा हुनेछ ।
अमेरिका भने बलियो टेस्ट राष्ट्रलाई हराउँदै लगातार दोस्रो जितसहित सपुर–८ चरणको यात्रा सहज बनाउने धुनमा रहने छ । यता पाकिस्तानले यही विश्वकपका लागि भनेर तीन महिना अगाडि कप्तान फेरेको छ । शाहिन शाह अफ्रिदीको स्थानमा बाबर आजम फेरि कप्तानका रूपमा फर्केका छन् । यो आफैंमा विवादास्पद निर्णय रह्यो । पछिल्लो समय ट्वान्टी ट्वान्टी क्रिकेटमा पाकिस्तानको प्रदर्शन पनि गतिलो रहन सकेको छैन ।
न्युजिल्यान्डविरुद्ध घरमा ट्वान्टी ट्वान्टी सिरिज बराबरी खेलेको पाकिस्तान आयरल्यान्डविरुद्धको सिरिजमा विजयी त रह्यो, तर पहिलो खेल गुमाएर दबाबमा पनि रह्यो । अहिले तत्कालका लागि पाकिस्तानी टिम खासै चर्चामा छैन । तर कप्तान आजम उत्साहित छन् । उनी भन्छन्, ‘पहिला सेमिफाइनल । त्यसपछि फाइनल । अब हाम्रो लक्ष्य उपाधि नै जित्ने हो ।’ समूह ‘ए’ मा रहेका दुई टोली भारत र पाकिस्तान टी–२० विश्वकपका पूर्वविजेता पनि हुन् ।
भारतले सन् २००७ मा पहिलो संस्करणको उपाधि जितेको थियो । पाकिस्तानले भने सन् २००९ मा सम्पन्न दोस्रो संस्करणको उपाधि चुमेको थियो । त्यतिबेला पाकिस्तानले फाइनलमा श्रीलङ्कालाई आठ विकेटले हराएको थियो । अन्तर्राष्ट्रिय क्रिकेट काउन्सिल (आईसीसी)द्वारा घोषित पछिल्लो टी–२० अन्तर्राष्ट्रिय वरीयतामा पाकिस्तानभन्दा अमेरिका निकै पछाडि छ । उक्त वरीयतामा पाकिस्तान छैटौँ र अमेरिका १८औँ स्थानमा आसीन छन् ।
पाकिस्तानी टोलीले टी–२० विश्वकपमा पहिलो संस्करणदेखि नै नियमित रूपमा सहभागिता जनाउँदै आएको छ । अमेरिकाको भने टी–२० विश्वकपमा यो पहिलो सहभागिता हो । यसपटक अमेरिका आयोजकका रूपमा विश्वकपमा उपस्थित भएको हो । पाकिस्तान भने अघिल्लो विश्वकपमा गरेको प्रदर्शनका आधारमा सिधै विश्वकपमा छनोट भएको हो । पाकिस्तानले हालसम्म टी–२० विश्वकपमा कुल ४७ खेल खेलिसकेको छ ।
पाकिस्तान त्यसमध्ये २८ खेलमा विजयी भएको छ भने १८ खेलमा पराजित । पाकिस्तानी टोलीको एक खेल भने अनिर्णीत रूपमा सकिएको छ । यसको विपरीत अमेरिकाले टी–२० विश्वकपमा हालसम्म एक खेलमात्र खेलेको छ । त्यो खेल पनि यही विश्वकपमा खेलेको हो । यस अर्थमा टी–२० विश्वकपमा अमेरिकाको यात्रा निकै सुखद देखिन्छ । टी–२० विश्वकपको इतिहासमा पाकिस्तान सफल टोलीका रूपमा दरिएको छ ।
पाकिस्तानी टोली तीनपटक टी–२० विश्वकपको फाइनलमा पुगिसकेको छ । त्यसमध्ये एक पटक उपाधि जित्न सफल भएको पाकिस्तान बाँकी दुई अवसरमा भने फाइनलमा पराजित भएको छ । टी–२० विश्वकपको पहिलो संस्करणको फाइनलमा पाकिस्तानलाई चिर प्रतिद्वन्द्वी भारतले पाँच रनले पराजित गरेको थियो । पाकिस्तान टी–२० विश्वकपको साबिक उपविजेता पनि हो ।
सन् २०२२ मा सम्पन्न टी–२० विश्वकपको फाइनलमा इङ्गल्यान्डले पाकिस्तानलाई पाँच विकेटले हराएको थियो । पाकिस्तान र अमेरिकाले यसअघि टी–२० अन्तर्राष्ट्रिय क्रिकेटमा आपसमा एक खेल पनि खेलेका छैनन् । त्यसैले बिहीबार राति यी दुई टोली पहिलो पटक आपसमा भिड्ने छन् । यी दुई टोलीको पछिल्लो पाँच खेलको अवस्थालाई हेर्दा भने पाकिस्तानभन्दा अमेरिकाको नतिजा आकर्षक देखिन्छ ।
अमेरिकी टोली आफूले खेलेका पछिल्ला पाँचमध्ये चार खेलमा विजयी भएको छ । बाँकी एक खेलमा भने अमेरिका पराजित भएको छ । अर्कोतिर, पाकिस्तानी टोलीले आफूले खेलेको पछिल्ला पाँचमध्ये एक खेलमा मात्र जित हात पार्न सकेको छ । अमेरिकाले गत अप्रिल १३ तारिखमा खेलिएको खेलमा क्यानडालाई चार विकेटले हराएको थियो । त्यसपछि मे २१ तारिखमा खेलिएको खेलमा अमेरिकाले बङ्गलादेशलाई पाँच विकेटले पराजित गरेको थियो ।
मे २३ तारिखमा खेलिएको खेलमा अमेरिकाले बङ्गलादेशलाई ६ रनले हराएको थियो । यसैगरी मे २५ तारिखमा खेलिएको खेलमा भने अमेरिकी टोली बङ्गलादेशसँग १० विकेटले पराजित भएको थियो । त्यसपछि जुन २ तारिखमा खेलिएको खेलमा अमेरिकाले क्यानडालाई सात विकेटले पराजित गरेको थियो । पाकिस्तानले भने गत मे १४ तारिखमा खेलिएको खेलमा आयरल्यान्डलाई ६ विकेटले हराएको थियो ।
मे २२ तारिखमा पाकिस्तान र इङ्गल्यान्डबिच हुने भनिएको खेल वर्षाका कारण रद्द भएको थियो । मे २५ तारिखमा खेलिएको खेलमा इङ्गल्यान्डले पाकिस्तानलाई २३ रनले हराएको थियो । यसैगरी विश्वकप सुरु हुनुअघि मे २८ तारिखमा पाकिस्तान र इङ्गल्यान्डबिच हुने भनिएको खेल भने वर्षाका कारण रद्द हुन पुगेको थियो ।
विश्वकप सुरु हुनुअघि मे ३० तारिखमा खेलिएको आफ्नो अन्तिम खेलमा पाकिस्तानी टोली इङ्ल्यान्डसँग सात विकेटले हारेको थियो । यसरी पछिल्लो समय अमेरिकी टोली लयमा देखिएको छ । त्यसमाथि विश्वकप सुरु हुनुभन्दा ठिकअघि बङ्गलादेशजस्तो बलियो टोलीलाई हराएपछि अमेरिकाको मनोबल अझ उच्च देखिएको छ ।
त्यसमाथि अमेरिकाविरुद्धको खेल सुरु हुनुअघि आफ्ना प्रभावशाली बलर इमाद वसिम घाइते हुँदा पाकिस्तान थप दबाबमा परेको छ । घाइते भएका कारण अमेरिकाविरुद्धको खेलमा पाकिस्तानी टोलीका अलराउन्डर इमाद वसिम उपस्थित हुने छैनन् । इमादको चोटले पाकिस्तानी टोली थप दबाबमा परेको छ । इमाद वसिम घाइते भएपछि कप्तान बाबर आजम पनि चिन्तित देखिएका छन् ।
इमाद वसिम विश्वकप खेल्न सन्न्यास फिर्ता लिएर पाकिस्तानी टोलीमा फर्किएका हुन् । इमादसँगै तिब्रगतिका बलर मोहम्मद आमिरले पनि विश्वकप खेल्न आफ्नो सन्न्यास फिर्ता लिएका थिए । सन्न्यास फिर्ता लिएलगत्तै इमादलाई न्युजिल्यान्ड, आयरल्यान्ड र इङ्गल्यान्डविरुद्धको टी–२० शृङ्खलाका लागि टोलीमा समावेश गरिएको थियो ।
अमेरिकाको सम्भावित टोलीमा मोनांक पटेल, स्टिभन टेलर, एन्ड्रिज गौस, एरोन जोन्स, नितिस कुमार, कोरी एन्डर्सन, हरमित सिंह, साड्ली भान साल्कविक, जसदीप सिंह, अली खान र सौरभ नेत्रवाल्कर रहेका छन् । यसैगरी पाकिस्तानको सम्भावित टोलीमा बाबर आजम, मोहम्मद रिजवान, साइम अयुब, फाखर जामन, सदाब खान, ईफ्तिखार अहमद, आजम खान, साहिन शाह अफ्रिदी, नसिम शाह, ह्यारिस रौफ र मोहम्मद आमिर रहेका छन् ।
पाकिस्तानी टिम रनका लागि अत्याधिक कप्तान आजम र मोहम्मद रिजवानमा निर्भर हुनेछ । बलरमा अफ्रिदी प्रमुख रहने छन् नै । खासमा पाकिस्तानको प्रमुख अस्त्र भनेकै सटिक बलिङ आक्रमण नै हो । पाकिस्तान यो विश्वकपमा त्यो समूहमा छ, जसमा भारत पनि छ । जति बेला पाकिस्तान र भारत भिड्ने छन्, त्यो यस विश्वकपकै सबैभन्दा ठूलो खेल हुनेछ ।
